മലയാളികളുടെ പ്രിയ നടൻ സുരേഷ് ഗോപി നായകവേഷത്തിലെത്തുന്ന ഗരുഡൻ ഗംഭീര സിനിമയാകുമെന്ന സൂചനകളാണ് പുറത്ത് വരുന്ന വീഡിയോകളെല്ലാം നൽകുന്നത്. അടുത്തിടെ പുറത്തിറങ്ങിയ ടീസർ ആരാധകർക്ക് കൂടുതൽ പ്രതീക്ഷ നൽകുന്നതായിരുന്നു. ചിത്രവുമായി ബന്ധപ്പെട്ട് അണിയറ പ്രവർത്തകർ പുറത്തുവിടുന്ന എല്ലാ ദൃശ്യങ്ങളും ഇരുകയ്യും നീട്ടിയാണ് ആരാധകർ സ്വീകരിക്കുന്നത്. ഇപ്പോഴിതാ കാറിൽ നിന്നും ഇറങ്ങി വരുന്ന സുരേഷ് ഗോപിയുടെ വീഡിയോ ആണ് സമൂഹമാദ്ധ്യമങ്ങളിൽ വൈറലാകുന്നത്.
വാഹനത്തിൽ നിന്നും ഇറങ്ങി വന്ന് നിന്ന് ചിത്രത്തിന്റെ അണിയറ പ്രവർത്തകരുമായി സംസാരിക്കുന്നതും അവരുമായി സമയം ചിലവിടുന്നതുമായ ദൃശ്യമാണ് പുറത്തുവിട്ടിരുക്കുന്നത്. ചിത്രത്തിൽ മറ്റൊരു കേന്ദ്ര കഥാപത്രത്തെ അവതരിപ്പിക്കുന്ന ബിജുമേനോനെയും വീഡിയോയിൽ കാണാം. വളരെ പെട്ടെന്നാണ് വീഡിയോ ആരാധകർ ഏറ്റെടുത്തത്. ഇത്തരത്തിൽ ലൊക്കേഷനിൽ താരം സഹപ്രവർത്തകർക്കൊപ്പം നിൽക്കുന്ന മറ്റൊരു വീഡിയോയും അണിയറ പ്രവർത്തകർ പുറത്തുവിട്ടിരുന്നു.
സുരേഷ് ഗോപിയും ബിജുമേനോനും കേന്ദ്ര കഥാപാത്രങ്ങളായി എത്തുന്ന ഗരുഡൻ ബിഗ് ബജറ്റിലാണ് ഒരുങ്ങുന്നത്. കൊച്ചിയിലും ഹൈദരാബാദിലുമായി ചിത്രീകരണം പുരോഗമിച്ചുകൊണ്ടിരിക്കുന്ന ചിത്രത്തിന്റെ ലൊക്കേഷൻ കാഴ്ചകളാണ് ഇപ്പോൾ സമൂഹമാദ്ധ്യമങ്ങളിൽ തരംഗമായിരിക്കുന്നത്.
ഒരു ക്രൈം ത്രില്ലർ വിഭാഗത്തിൽപ്പെടുന്ന ചിത്രമാണ് ഗരുഡൻ. നവാഗതനായ അരുൺ വർമ്മയാണ് ചിത്രത്തിന്റെ സംവിധാനം നിർവഹിക്കുന്നത്. മാജിക് ഫ്രെയിംല് ഫിലിംസിന്റെ ബാനറിൽ ലിസ്റ്റിൻ സ്റ്റീഫൻ നിർമ്മിക്കുന്ന ചിത്രത്തിന് തിരക്കഥ ഒരുക്കിയിരിക്കുന്നത് മിഥുൻ മാനുവൽ തോമസ് ആണ്. സിദ്ദിഖ്, ദിലീഷ് പോത്തൻ, ജഗദീഷ്, മേജർ രവി, നിഷാന്ത് സാഗർ, ജയ്സ് ജോസ്, രഞ്ജിത്ത് കങ്കോൾ, രഞ്ജിനി, മാളവിക എന്നീ താരങ്ങളും ചിത്രത്തിൽ അണിനിരക്കുന്നുണ്ട്.
Comments