ന്യൂഡൽഹി: ഐഎഎസ്, ഐപിഎസ് പുരുഷ ഉദ്യോഗസ്ഥർക്ക് ശിശുപരിപാലനത്തിനായി ശമ്പളത്തോട് കൂടിയ അവധി നൽകാൻ കേന്ദ്രം. ഭാര്യ മരിക്കുകയോ, വിവാഹ മോചനം നേടുകയോ ചെയ്തിട്ടുള്ള പുരുഷ ഓഫീസർമാർക്ക് രണ്ട് വർഷം വരെ ശമ്പളത്തോടെ അവധിയെടുക്കാൻ കഴിയും. നേരത്തെ ഇത്തരത്തിൽ വനിതാ ഉദ്യോഗസ്ഥർക്ക് മാത്രമായിരുന്നു അവധി നൽകിയിരുന്നത്. പുതിയ ചട്ടം 18 വയസിൽ താഴെ പ്രായമുള്ള മക്കളുള്ള സിംഗിൾ പാരന്റ് ആയ പുരുഷ ഉദ്യോഗസ്ഥർക്ക് ഗുണം ചെയ്യും.
ഒഴിവാക്കാൻ കഴിയാത്ത ചില സാഹചര്യങ്ങളിൽ അല്ലാതെ പ്രൊബേഷൻ കാലത്ത് ഈ ആനുകൂല്യം ലഭ്യമാകില്ല. എടുക്കുന്ന അവധി അഞ്ച് ദിവസത്തിൽ കുറയാൻ പാടില്ലെന്നും ഉത്തരവിൽ പറയുന്നു. ശിശുപരിപാലനത്തിന് വേണ്ടിയുള്ള അവധി അപേക്ഷയ്‌ക്ക് മറ്റ് ലീവുകളുമായി ബന്ധമില്ലെന്നും കേന്ദ്ര സർക്കാർ പുറത്തിറക്കിയ ഉത്തരവിൽ പറയുന്നു. 1955-ലെ അഖിലേന്ത്യ ലീവ് ചട്ടത്തിൽ ഭേദഗതി വരുത്തി, കേന്ദ്ര പേഴ്‌സണൽ മന്ത്രാലയമാണ് പുതിയ ഉത്തരവിറക്കിയത്.
കലണ്ടർ വർഷത്തിൽ മൂന്ന് തവണയാണ് ഈ ആനുകൂല്യം ഉപയോഗിക്കാൻ കഴിയുക. കുട്ടികളുടെ ആരോഗ്യം, വിദ്യാഭ്യാസം എന്നിവയ്‌ക്കാണ് അവധി നൽകുന്നത്. അവധിയിൽ പ്രവേശിക്കുന്നവർക്ക് അതിനുമുൻപ് അവസാനമായി വാങ്ങിയ ശമ്പളം ആദ്യ വർഷത്തെ അവധി കാലയളവിൽ ലഭിക്കും. രണ്ടാം വർഷത്തിൽ ഇത് ശമ്പളത്തിന്റെ എൺപത് ശതമാനവും ആയിരിക്കും.
