സ്വയംപ്രഭാ യോഗിനിക്കു ശേഷം വാനര സംഘത്തിന് വാക്സഹായം ചെയ്തത് സമ്പാതി എന്ന പക്ഷി ശ്രേഷ്ഠനാണ്. അന്വേഷണത്തിന് പോയ വാനരസംഘം സമുദ്രതീരത്ത് എത്തി. ഇനിയെന്ത്.? അന്വേഷണം എങ്ങും എത്തിയില്ല, വഴിമുട്ടി നിൽക്കുന്നു..!! സ്വയംപ്രഭയുടെ സങ്കേതത്തിൽ കഴിഞ്ഞ് സമയം പോയതറിഞ്ഞില്ല. പുറപ്പെട്ടിട്ട് ഒരു മാസം കഴിഞ്ഞോ എന്നും വ്യക്തമല്ല. 30 ദിവസത്തിനുള്ളിൽ സീതയെക്കുറിച്ച് വിവരങ്ങൾ ശേഖരിക്കാതെ വരുന്നവർക്ക് കടുത്ത ശിക്ഷ ഉണ്ടാകുമെന്നാണ് സുഗ്രീവാജ്ഞ. ഇനി ഇപ്പോൾ കിഷ്ക്കിന്ധയിലേക്ക് ചെന്നിട്ട് കാര്യമില്ല. ഇവിടെ കിടന്ന് മരിക്കുകയുള്ളൂ. ശ്രീരാമസ്വാമിക്ക് സഹായം ചെയ്തു, ശ്രീരാമന്റെ കാൽക്കൽ, ഭഗവാന്റെ തലോടലേറ്റ് മരിക്കാൻ കഴിഞ്ഞ ജഡായു എത്ര ഭാഗ്യവാൻ.!.ആശയറ്റ് ആകാശം നോക്കി കിടന്ന വാനരന്മാരുടെ സംസാരം ശ്രദ്ധിച്ചു കൊണ്ട് അവിടെ ഒരു ഭീമാകാരനായ പക്ഷി ഇരിപ്പുണ്ടായിരുന്നു.
വാനരമാരുടെ സംസാരത്തിൽ “ജഡായു” എന്ന് കേട്ടപ്പോൾ അവിടെയുണ്ടായിരുന്ന ആ പക്ഷി രാജൻ സമ്പാതിക്ക് മുഖമൊന്നു വിടർന്നു. ആരാണ് ജഡായു എന്ന വാക്ക് പറഞ്ഞത്.? തുടരെയുള്ള ചോദ്യങ്ങൾ ഉതിർന്നപ്പോൾ അംഗദൻ കാര്യം വിശദീകരിച്ചു. ജഡായുവിനെക്കുറിച്ചുള്ള എന്തെങ്കിലും വിവരം കിട്ടിയതിൽ സമ്പാതി സന്തോഷിച്ചു. എന്നാൽ ജഡായു മരണപ്പെട്ടത് അറിഞ്ഞ് സമ്പാതി ദുഃഖിച്ചു. സമ്പാതിയുടെ മുഖം വിവർണമായി തന്റെ അനുജൻ, അനുജനുവേണ്ടി ബാലികർമ്മങ്ങൾ നടത്താൻ സമ്പാതി വാനര സംഘത്തിന്റെ സഹായം ആവശ്യപ്പെട്ടു. കർമ്മങ്ങൾക്ക് ശേഷം സീതാദേവിയെ സംബന്ധിച്ച കൂടുതൽ വിവരങ്ങൾ സമ്പാതി വാനര സംഘത്തെ അറിയിച്ചു. രാവണൻ സീതയെ ലങ്കയിലേക്ക് കൊണ്ടുപോയി. ഇവിടെനിന്ന് 100 യോജന (ഏകദേശം 1200 കിലോമീറ്റർ) മാറിയാണ് ലങ്ക. സമുദ്രം ചാടിക്കടന്നു വേണം ലങ്കയിൽ എത്താൻ. ആര് പോകും?
100 യോജന ചാടാൻ ആർക്ക് സാധിക്കും.? ആർക്കാണ് അതിന് ധൈര്യമുള്ളത്..? ഒടുവിൽ ജാംബവാൻ ഹനുമാന്റെ ശക്തിയെ ഓർമ്മപ്പെടുത്തി നല്ല പ്രോത്സാഹനം നൽകി. നിന്റെ കുട്ടി പ്രായത്തിൽ സൂര്യനെ കണ്ടു ഏതോ പഴം ആണെന്ന് കരുതി 500 യോജന മേൽപ്പോട്ട് ചാടിയവനാണ് നീ. പിന്നെ നിനക്ക് ഈ 100 യോജന എത്ര നിസ്സാരം. പോരാത്തതിന് ശ്രീരാമചന്ദ്രൻ മുദ്രമോതിരം നൽകിയത് നിന്റെ കയ്യിലല്ലേ.? ഇത് കേട്ടതോടെ ഉണർവ് നേടിയ ഹനുമാൻ ചാടാൻ തയ്യാറെടുത്തു. മഹേന്ദ്രാചലത്തിന്റെ മുകളിൽ കയറി ലങ്കയെ ലക്ഷ്യമാക്കി ചാടാൻ ഒരുങ്ങി.
എഴുതിയത്
എ പി ജയശങ്കർ
ഫോൺ : 9447213643
ശ്രീ എ പി ജയശങ്കർ എഴുതിയ രാമായണ തത്വ വിചാരത്തിന്റെ മറ്റു ഭാഗങ്ങൾ വായിക്കാൻ ഈ ലിങ്കിൽ ക്ലിക്ക് ചെയ്യുക
https://janamtv.com/tag/ramayana-thatwavicharam/
