തിരുവനന്തപുരം ; സ്പീക്കർ എ.എൻ.ഷംസീറുമായി ബന്ധപ്പെട്ട ‘മിത്ത് വിവാദത്തിൽ’ ദേവസ്വം വകുപ്പിനെ പരിഹസിച്ച നടൻ സലിം സലിം കുമാറിനെതിരെ ദേവസ്വം മന്ത്രി കെ.രാധാകൃഷ്ണൻ. ദേവസ്വം വരുമാനത്തെ പരിഹസിക്കുന്നതു ശരിയല്ലെന്ന് കെ.രാധാകൃഷ്ണൻ അഭിപ്രായപ്പെട്ടു. വിശ്വാസത്തിന്റെ ശാസ്ത്രീയത പരിശോധിക്കേണ്ടതു ദേവസ്വം മന്ത്രിയല്ലെന്നും കെ.രാധാകൃഷ്ണൻ ചൂണ്ടിക്കാട്ടി
ക്ഷേത്രങ്ങളിലെ ഭൗതിക സാഹചര്യം മെച്ചപ്പെടുത്താൻ ഈ സർക്കാർ ഒരുപാട് കാര്യങ്ങൾ ചെയ്യുന്നുണ്ട്. വിശ്വാസങ്ങളെ സംരക്ഷിക്കാൻ ചെയ്യുന്നതെല്ലാം സർക്കാർ ചെയ്യുന്നുണ്ടെന്നും മന്ത്രി വ്യക്തമാ‌ക്കി. ദേവസ്വം ബോര്‍ഡിന് ലഭിക്കുന്ന പണത്തെ ‘മിത്തു മണി’ എന്ന് കളിയാക്കുന്നത് ശരിയല്ല.
തന്നെ കുറിച്ച് പറയുന്നതിൽ ഒന്നും പറയാനില്ല. വിശ്വാസത്തെ തകർക്കാൻ ഒരിക്കലും ശ്രമിക്കില്ല. സമൂഹത്തെ ഇളക്കി വിടാൻ എളുപ്പമായിരിക്കും. വിശ്വാസത്തെ പോറൽ ഏൽപ്പിക്കാൻ ശ്രമിക്കില്ലെന്നും മന്ത്രി പറഞ്ഞു. മിത്ത്, ശാസ്ത്ര വിവാദത്തിൽ സ്പീക്കർ എ എൻ ഷംസീർ കാര്യങ്ങൾ വിശദമാക്കിയിട്ടുണ്ട്. വിശ്വാസങ്ങളെ വ്രണപ്പെടുത്താൻ സർക്കാർ ഒന്നും ചെയ്യുന്നില്ല.
നടൻ സലീം കുമാർ ദേവസ്വം മന്ത്രിയെ മിത്തിസം വകുപ്പ് മന്ത്രിയെന്നും ലഭിക്കുന്ന പണത്തെ മിത്തു മണി എന്ന് വിളിക്കണമെന്നും പരിഹസിച്ചതിന് പിന്നാലെയാണ് മന്ത്രിയുടെ പ്രതികരണം.
