രാമായണത്തിലെ ഏറ്റവും സുന്ദരമായ ഭാഗമാണ് സുന്ദരകാണ്ഡം. മഹത്തായ ഒരു ദൂതിന്റെ നിർവഹണം യോഗയും ഉപാസനയും ഒക്കെയായി അഷ്ട സിദ്ധികളും നേടിയ ഹനുമാന്റെ വിചിത്രമായ പ്രവർത്തികൾ.100 യോജന ചാടിക്കടന്ന് ലങ്കയിൽ എത്താൻ ഹനുമാനു പ്രയാസം ഉണ്ടായില്ല. മാർഗത്തിൽ വന്ന വിഘ്നങ്ങൾ എല്ലാം തച്ചുടച്ചു ശരീരത്തിന്റെ വലിപ്പവും വർദ്ധിപ്പിച്ച് സുരസയെ അതിശയിപ്പിച്ചു. പിന്നെ ചെറുതായി അവളുടെ വായിൽ കൂടി കയറി പുറത്തുവന്നു. അമ്മയെന്ന അഭിസംബോധന ചെയ്തതോടെ സുരസ തന്റെ പരീക്ഷകൾ ദേവ നിയോഗമനുസരിച്ചാണെന്ന് വ്യക്തമാക്കി മറഞ്ഞു. നിഴൽ പിടിച്ചു വലിച്ച സിംഹികയെ തകർത്ത് മുന്നോട്ടുപോയി. ലങ്കയിൽ കാലുകുത്തിയപ്പോൾ തന്നെ ലങ്കാലക്ഷ്മി നഗരം വിട്ടുപോയി.
അശോക വനികയിൽ ശിംശിപാ വൃക്ഷ ചുവട്ടിൽ സീതാദേവിയെ കണ്ടെത്തി. ശ്രീരാമവൃത്താന്തങ്ങൾ അറിയിച്ചു പരസ്പരം അടയാളവാക്കുകളും കൈമാറി. സീതാദേവിയെ കണ്ടെത്തിയശേഷം ഹനുമാൻ തന്റെ കർത്തവ്യങ്ങളെ കുറിച്ച് കൂടുതൽ ചിന്തിച്ചു. ഒരു സ്വാമി കാര്യത്തിനായി ഒരു ദൂതൻ നിയോഗിക്കപ്പെട്ടാൽ ആ കാര്യനിർവഹണം മാത്രമായി നിർത്തരുത്. “ഹൃദ ചതുരതയോടപരമൊരു കാര്യം നീതിയോടെ ചെയ്തു പോമവനുത്തമൻ”..അതിനായി രാവണനെ കണ്ട് തന്റെ വരവിന്റെ സന്ദേശം അറിയിക്കണം.
അതിനായി രാവണന്റെ ഉദ്യാനത്തിൽ കടന്ന് തടുക്കാൻ വന്നവരെ ആക്രമിച്ചു. വിവരമറിഞ്ഞ് ഹനുമാനെ പിടികൂടാൻ വന്ന രാവണപുത്രൻ അക്ഷകുമാരനെ ഹനുമാൻ വധിച്ചു. മൂത്ത പുത്രൻ ഇന്ദ്രജിത്ത് ഹനുമാനെ ആക്രമിച്ചു. ബ്രഹ്മാസ്ത്രത്തിൽ ബന്ധിച്ച് രാവണ സവിധത്തിൽ കൊണ്ടുവന്നു, അവിടെവച്ചാണ് ഭീഷണിക്ക് വഴങ്ങാത്തവൻ ആയ വിഭീഷണനെ പരിചയപ്പെടുന്നത്, രാക്ഷസ വംശത്തിന്റെ ഭാവി രാജാവ്. ലങ്കാദഹനവും പൂർത്തിയാക്കി വാലിലെ തീയും അണച്ച് തിരിച്ചു തന്റെ കൂട്ടുകാരുടെ അടുത്തേക്ക് ചാടിക്കടന്നു. “കണ്ടു സീതയെ ഞാൻ” എന്ന് ഉറക്കെ വിളിച്ചു പറഞ്ഞു. സീതാന്വേഷണ വിവരവും അറിയിച്ചു. ” കണ്ടേനേഹം ദേവിയെ തത്ര കർബുരേന്ദ്രാലയെ..” ലങ്കയിലെ വിവരങ്ങൾ മുഴുവൻ ശ്രീരാമനെയും അറിയിച്ചു, തികഞ്ഞ വാഗ്മിത്വത്തോടെ, കുറഞ്ഞ വാക്കുകളിൽ, കൂടുതൽ പക്വതയോടെ, കാര്യങ്ങൾ അറിയിക്കാൻ ഹനുമാൻ സ്വാമിക്ക് സാധിച്ചു.
എഴുതിയത്
എ പി ജയശങ്കർ
ഫോൺ : 9447213643
ശ്രീ എ പി ജയശങ്കർ എഴുതിയ രാമായണ തത്വ വിചാരത്തിന്റെ മറ്റു ഭാഗങ്ങൾ വായിക്കാൻ ഈ ലിങ്കിൽ ക്ലിക്ക് ചെയ്യുക
https://janamtv.com/tag/ramayana-thatwavicharam/
Comments