ഓണം റിലീസുകളിൽ സിനിമാ പ്രേമികൾ ആകാംക്ഷയോടെ കാത്തിരിക്കുന്ന ചിത്രമാണ് ദുൽഖർ സൽമാൻ നായകനാകുന്ന കിംഗ് ഓഫ് കൊത്ത. ചിത്രത്തിന്റേതായി പുറത്തിറങ്ങിയ പോസ്റ്ററുകളും ടീസറും ഗാനവുമെല്ലാം ജനങ്ങൾ ഏറ്റെടുത്തിരുന്നു. എന്നാൽ, സിനിമയുടെ ട്രെയിലറിനായുള്ള കാത്തിരിപ്പിലാണ് ആരാധകർ. ഓഗസ്റ്റ് 9-ന് ട്രെയിലർ റിലീസ് ചെയ്യുമെന്ന് അണിയറ പ്രവർത്തകർ നേരത്തെ അറിയിച്ചിരുന്നു. ഇപ്പോഴിതാ, കിംഗ് ഓഫ് കൊത്തയുടെ ട്രെയിലർ പുറത്തിറക്കുന്നത് മോഹൻലാൽ ആണെന്ന് അറിയിച്ചിരിക്കുകയാണ് നിർമ്മാതാക്കൾ. ഒരു ദുൽഖർ ചിത്രത്തിന്റെ ട്രെയിലർ മോഹൻലാലിന്റെ ഫേയ്സ്ബുക്കിലൂടെ റിലീസ് ചെയ്യുന്നതിന്റെ സന്തോഷത്തിലാണ് ആരാധകരും സിനിമാ പ്രേമികളും.
ഓഗസ്റ്റ് 24-നാണ് സിനിമ ലോകമൊട്ടാകെയുള്ള തിയറ്ററുകളിൽ റിലീസ് ചെയ്യുന്നത്. അഭിലാഷ് ജോഷി സംവിധാനം ചെയ്യുന്ന ചിത്രം മലയാളത്തിന് പുറമെ തമിഴ്, ഹിന്ദി, കന്നഡ, തെലുങ്ക് എന്നീ ഭാഷകളിലും പുറത്തിറങ്ങും. എല്ലാ ഭാഷയിലും ദുൽഖർ തന്നെ ഡബ്ബ് ചെയ്യുന്നു എന്നതാണ് പ്രത്യേകത. ദുൽഖർ സൽമാനോടൊപ്പം ഷബീർ കല്ലറക്കൽ, ചെമ്പൻ വിനോദ്, പ്രസന്ന, ഗോകുൽ സുരേഷ്, ഷമ്മി തിലകൻ, ഐശ്വര്യാ ലക്ഷ്മി, നൈല ഉഷ, ശാന്തി കൃഷ്ണ, അനിഖാ സുരേന്ദ്രൻ തുടങ്ങി വൻ താരനിര തന്നെയാണ് കിംഗ് ഓഫ് കൊത്തയിൽ അണിനിരക്കുന്നത്.
സീ സ്റ്റുഡിയോസും ദുൽഖർ സൽമാന്റെ വേഫേറെർ ഫിലിംസും ചേർന്നാണ് കിംഗ് ഓഫ് കൊത്ത നിർമ്മിക്കുന്നത്. ഛായാഗ്രഹണം നിമീഷ് രവിയാണ്. ജേക്സ് ബിജോയ്, ഷാൻ റഹ്മാൻ എന്നിവർ ചേർന്നാണ് ചിത്രത്തിന് സംഗീതമൊരുക്കുന്നത്. സംഘട്ടനം-രാജശേഖർ, സ്ക്രിപ്റ്റ്-അഭിലാഷ് എൻ ചന്ദ്രൻ, പ്രൊഡക്ഷൻ ഡിസൈനർ-നിമേഷ് താനൂർ, എഡിറ്റർ-ശ്യാം ശശിധരൻ, കൊറിയോഗ്രാഫി-ഷെറീഫ് ,വിഎഫ്എക്സ്-എഗ്ഗ് വൈറ്റ്, മേക്കപ്പ്-റോണെക്സ് സേവിയർ, വസ്ത്രാലങ്കാരം-പ്രവീൺ വർമ്മ, സ്റ്റിൽ-ഷുഹൈബ് എസ് ബി കെ, പ്രൊഡക്ഷൻ കൺട്രോളർ-ദീപക് പരമേശ്വരൻ, മ്യൂസിക്-സോണി മ്യൂസിക്, പിആർഓ- പ്രതീഷ് ശേഖർ.
