മുംബൈ: വിവിധ മേഖലകളില്‍ നിന്നടക്കം കഴിഞ്ഞ അഞ്ചുവര്‍ഷത്തിനിടെ ബിസിസിഐയ്‌ക്ക് വരുമാനമായി ലഭിച്ചത് 27,411 കോടി രൂപ. 2018 മുതല്‍ 2022 വരെയുള്ള കണക്കുകളാണ് ധനകാര്യ സഹമന്ത്രി പങ്കജ് ചൗധരി രാജ്യസഭയില്‍ പുറത്തുവിട്ടത്. ഉദ്ധവ് വിഭാഗം എം.പി അനില്‍ ദേശായിയുടെ ചോദ്യത്തിനുള്ള മറുപടിയിലാണ് മന്ത്രി കണക്കുകള്‍ നിരത്തിയത്.
സംപ്രേക്ഷണവകാശം, സ്പോണ്‍ഷിപ്പ്, ഐസിസിയില്‍ നിന്ന് ലഭിച്ച വിവിതം എന്നിവ ഉള്‍പ്പെടെയാണ് ബിസിസിഐ ഇത്രയും വരുമാനമുണ്ടാക്കിയത്. ചെലവ്, നികുതി എന്നിവയെ കുറിച്ചും ദേശായി ചോദ്യമുന്നയിച്ചിരുന്നു.ഇതിന് മറുപടിയാണ് കണക്കുകള്‍ അക്കമിട്ട് നിരത്തിയത്.
2020-21 സാമ്പത്തിക വര്‍ഷത്തില്‍ ബിസിസിഐ 844.92 കോടി രൂപ ആദായ നികുതി അടച്ചതായി ചൗധരി മറുപടി പറഞ്ഞു. മുമ്പ് വന്ന റിപ്പോര്‍ട്ടുകള്‍ പ്രകാരം ബിസിസിഐ കഴിഞ്ഞ സാമ്പത്തിക വര്‍ഷത്തില്‍ 1159 കോടി രൂപ നികുതിയിനത്തില്‍ അടച്ചുവെന്നും. കഴിഞ്ഞ അഞ്ച് വര്‍ഷത്തിനിടെ 4298 കോടി ആദായനികുതി ബിസിസിഐ അടച്ചുവെന്നും പങ്കജ് ചൗധരി മറുപടി നല്‍കി. നേരത്തെ, 2019-20ല്‍ 882.29 കോടി രൂപ നല്‍കിയിരുന്നു. 2019 സാമ്പത്തിക വര്‍ഷത്തില്‍ ബോര്‍ഡ് 815.08 കോടി രൂപ നികുതിയായി അടച്ചു.
