ഓർമ്മകൾ മനസ്സിന്റെ ഭാരം കൂട്ടുന്നു; സാറിന്റെ നഷ്ടം നികത്താനാവാത്തത്; സംവിധായകൻ സിദ്ദിഖിന്റെ കുടുബത്തെ സന്ദർശിച്ച് സൂര്യ

അന്തരിച്ച സംവിധായകൻ സിദ്ദിഖിന്റെ കുടുംബത്തെ സന്ദർശിച്ച് തമിഴ് നടൻ സൂര്യ. നിർമാതാവ് രാജശേഖരനൊപ്പമാണ് സൂര്യ കാക്കനാടുള്ള സിദ്ദിഖിന്റെ വീട്ടിൽ എത്തിയത്. സിദ്ദിഖിന്റെ തമിഴ് അരങ്ങേറ്റ ചിത്രമായ ഫ്രണ്ട്സിൽ കേന്ദ്ര കഥാപാത്രത്തെ സൂര്യയായിരുന്നു അവതരിപ്പിച്ചിരുന്നത്. മലയാളത്തിൽ സിദ്ദിഖ് സംവിധാനം ചെയ്ത ഫ്രണ്ട്സ് എന്ന ചിത്രത്തിന്റെ തമിഴ്പ്പായിരുന്നു ചിത്രം. സൂര്യയുടെ കരിയറിലെ തന്നെ ഏറ്റവും മികച്ച ചിത്രങ്ങളിൽ ഒന്ന് കൂടിയായിരുന്നു ഫ്രണ്ട്സ്.

Siddique Sir 🙏🏾 pic.twitter.com/o3St0wOrlb

— Suriya Sivakumar (@Suriya_offl) August 9, 2023

“>

സിദ്ദിഖുമായുള്ള ആത്മ ബന്ധത്തെ കുറിച്ചും തന്റെ കരിയറിൽസിദ്ദിഖിന്റെ സ്വാധീനത്തെ കുറിച്ചും സൂര്യ എഴുതിയ കുറിപ്പിൽ പറയുന്നു.

“ഓർമ്മകൾ മനസ്സിന്റെ ഭാരം കൂട്ടുന്നു. സിദ്ദിഖ് സാറിന്റെ നഷ്ടം നികത്താനാവാത്തതാണ്. കുടുംബത്തിനും സുഹൃത്തിനും അനുശോചനങ്ങൾ അറിയിക്കുന്നു. ഈ വേദനയിൽ ഞാനും നിങ്ങൾക്കൊപ്പമുണ്ട്.

ഫ്രണ്ട്സ് എന്റെ ജീവിതത്തിലെ ഒരു പ്രധാനപ്പെട്ട ചിത്രമായിരുന്നു, പല രീതിയിൽ. നമ്മൾ ഒരു സീനിൽ ചെറിയ രീതിയിൽ ഇംപ്രൂവ് ചെയ്താൽ പോലും അതിനെ പ്രകീർത്തിക്കാനും പ്രശംസിക്കാനും എപ്പോഴും തയ്യാറായ ആളായിരുന്നു സിദ്ദിഖ് സാർ. എന്റെ പെർഫോമൻസിനെ കുറിച്ചുള്ള അദ്ദേഹത്തിന്റെ നിരീക്ഷണങ്ങൾ സ്നേഹപൂർവ്വം എന്നോട് പറഞ്ഞിട്ടുണ്ട്. ഫിലിം മേക്കിംഗ് എന്ന പ്രക്രിയയെ ആസ്വദിക്കാൻ എന്നെ പഠിപ്പിച്ചത് അദ്ദേഹമാണ്. ചിരിയോടെ സമീപിക്കാനും അമിതമായ ഗൗരവത്തോടെ കാര്യങ്ങളെ സമീപിക്കേണ്ടതില്ലെന്നും അദ്ദേഹത്തിൽ നിന്നാണ് പഠിച്ചത്.

ഫ്രണ്ട്സ് ചെയ്യുന്ന സമയത്ത് അദ്ദേഹം വളരെ സീനിയറും അറിയപ്പെടുന്ന സംവിധായകനുമായിരുന്നു. പക്ഷേ അദ്ദേഹം ഞങ്ങളെ എല്ലാവരെയും തുല്യരായി കണ്ടു, സൗഹൃദം പങ്കിട്ടു. അദ്ദേഹം ദേഷ്യപ്പെടുന്നതോ ശബ്ദം ഉയർത്തി സംസാരിക്കുന്നതോ ഞാൻ കണ്ടിട്ടേയില്ല. അദ്ദേഹത്തിനൊപ്പം ജോലി ചെയ്തത് എക്കാലത്തും സന്തോഷം നൽകുന്ന കാര്യമാണ്. അദ്ദേഹമെനിക്ക് തന്നത് അതുവരെ എന്നിൽ ഇല്ലാത്ത ഒരു കാര്യമാണ്- എന്റെ കഴിവിലും പ്രതിഭയിലും വിശ്വസിക്കാനുള്ള ആത്മവിശ്വാസം അദ്ദേഹം പകർന്നു. വർഷങ്ങൾക്കിപ്പുറവും, എപ്പോൾ കണ്ടാലും അദ്ദേഹം ഞാൻ ഹാപ്പിയല്ലേ, കുടുംബം നന്നായിരിക്കുന്നില്ലേ എന്നൊക്കെ ഏറെ കരുതലോടെ അന്വേഷിക്കും.

ഒരു നടനെന്ന രീതിയിൽ ഞാൻ രൂപപ്പെട്ടുവരുന്ന ആ കാലത്ത് താങ്കൾ എന്നിൽ കാണിച്ച വിശ്വാസത്തിനും പ്രതീക്ഷയ്‌ക്കും നന്ദി. ഞാൻ നിങ്ങളെ ഒരുപാട് മിസ്സ് ചെയ്യും. നിങ്ങൾ അടുത്തില്ലാതെയാവുമ്പോൾ അനുഭവിക്കേണ്ടി വരുന്ന ആ വേദനയെ മറികടക്കാൻ നിങ്ങളുടെ കുടുംബത്തിനും സുഹൃത്തുക്കൾക്കും സാധിക്കട്ടെ. നിങ്ങൾ പകർന്ന ഓർമകളും സ്നേഹവും മുന്നോട്ടുള്ള യാത്രയിലും ഞങ്ങൾക്കൊപ്പമുണ്ടാവും,” എന്നായിരുന്നു സിദ്ദിഖിനെ കുറിച്ചുള്ള സൂര്യയുടെ ഹൃദയസ്പർശിയായ കുറിപ്പ്.