ജയറാമിനെ നായകനാക്കി മിഥുൻ മാനുവൽ തോമസ് അണിയിച്ചൊരുക്കുന്ന ഏറ്റവും പുതിയ ചിത്രമാണ് ‘അബ്രഹാം ഓസ്‌ലർ’. ഒരു ഇടവേളയ്‌ക്ക് ശേഷം ജയറാം മലയാളത്തിലേക്ക് തിരികെയെത്തുന്ന ചിത്രം കൂടിയാണ് ഇത്. പേരിലെ കൗതുകം കൊണ്ട് പ്രഖ്യാപന സമയം മുതൽ തന്നെ ‘അബ്രഹാം ഓസ്‌ലർ’ ശ്രദ്ധനേടിയിരുന്നു.ഇപ്പോഴിതാ ഷൂട്ടിംഗ് പുരോഗമിക്കവേ ചിത്രത്തിൽ നടൻ മമ്മൂട്ടി ജോയിൻ ചെയ്തുവെന്ന റിപ്പോർട്ടുകൾ ആണ് പുറത്തുവരുന്നത്.
‘അബ്രഹാം ഓസ്‌ലറിൽ മമ്മൂട്ടി അതിഥി താരമായി എത്തുമെന്ന തരത്തിൽ വാർത്തകൾ നേരത്തെ പുറത്തുവന്നിരുന്നു. പ്രധാനപ്പെട്ടൊരു അതിഥി വേഷമാണ് മമ്മൂട്ടിയുടേതെന്നും 15 മിനിറ്റാകും ഈ റോൾ ഉള്ളതെന്നുമായിരുന്നു വാർത്തകൾ. മമ്മൂട്ടിയുടെ പുതിയ ഫോട്ടോയ്‌ക്ക് ഒപ്പമാണ് ‘അബ്രഹാം ഓസ്‌ലറി’ൽ മമ്മൂട്ടി ജോയിൻ ചെയ്തുവെന്ന തരത്തിൽ വാര്ത്തകൾ പരക്കുന്നത്. ഭീഷ്മപർവം ചിത്രത്തിലെ ലുക്കിലാണ് മമ്മൂട്ടി ഫോട്ടോകളിൽ പ്രത്യക്ഷപ്പെട്ടിരിക്കുന്നത്. എന്നാൽ ഈ കാര്യത്തിൽ ഔദ്യോഗിക സ്ഥിരീകരണങ്ങൾ ഒന്നും തന്നെ ഉണ്ടായിട്ടില്ല.
അതേസമയം വാർത്തകൾ ശരിയാണെങ്കിൽ ധ്രുവം, ട്വന്റി ട്വന്റി, കനൽക്കാറ്റ് തുടങ്ങിയ ചിത്രങ്ങൾക്ക് ശേഷം മമ്മൂട്ടിയും ജയറാമും ഒന്നിച്ച് സ്‌ക്രീനിൽ എത്തുന്ന സിനിമ കൂടിയാകും ഇത്. അഞ്ചാം പാതിരായ്‌ക്ക് ശേഷം മിഥുൻ സംവിധാനം ചെയ്യുന്ന ചിത്രമാണ് ‘അബ്രഹാം ഓസ്‌ലർ’. മെഡിക്കൽ പശ്ചാത്തലത്തിൽ ഒരുങ്ങുന്ന ഒരു ക്രൈം ത്രില്ലറാണ് അബ്രഹാം ഓസ്‌ലർ. ഏറെ ദുരുഹതകളും സസ്‌പെൻസുമൊക്കെ നിറഞ്ഞ ഒരു ഇൻവെസ്റ്റിഗേറ്റീവ് ത്രില്ലർ. കൊലക്കേസ് അന്വേഷണമാണ് പോലീസ് കമ്മീഷണർ അബ്രഹാം ഓസ്ലറിലൂടെ നടത്തുന്നത്.
ഡോ. രൺധീർ കൃഷ്ണൻ തിരക്കഥ ഒരുക്കുന്ന ചിത്രത്തിൽ അർജുൻ അശോകൻ, ജഗദീഷ്, ദിലീഷ് പോത്തൻ, അനശ്വര രാജൻ, സെന്തിൽ കൃഷ്ണ, അർജുൻ നന്ദകുമാർ, ആര്യ സലിം, അസീം ജമാൽ തുടങ്ങി താരനിരയും അണിനിരക്കുന്നുണ്ട്. ചിത്രം ഉടൻ തന്നെ തിയറ്ററുകളിൽ എത്തും.
