ന്യൂഡൽഹി: രാജ്യത്തിന്റെ 77-ാമത് സ്വാതന്ത്യദിനത്തിൽ ആഴക്കടലിൽ ദേശീയ പതാക ഉയർത്തി ഇന്ത്യൻ നാവികസേന. ആൻഡമാൻ നിക്കോബാർ ദ്വീപുകൾക്ക് സമീപം ബംഗാൾ ഉൾക്കടലിലാണ് നാവികസേനയുടെ മുങ്ങൽ വിദഗ്ദർ പതാക ഉയർത്തിയത്. ഇന്ത്യൻ കോസ്റ്റ് ഗാർഡിന്റെ മുങ്ങൽ വിദഗ്ധരും സ്വാതന്ത്ര്യ ദിനാഘോഷത്തിൽ പങ്കെടുത്തു.
ഇന്ത്യൻ നാവികസേനയുടെ ഈസ്റ്റേൺ ഫ്ലീറ്റും പ്രധാനമന്ത്രിയുടെ ഹർ ഘർ തിരംഗയിൽ പങ്കെടുത്തു. നാവികസേനയുടെ മിസൈൽ നശീകരണ കപ്പലായ ഐഎൻഎസ് റാണയിൽ അവർ ദേശീയ പതാക ഉയർത്തി. രാജ്യത്തിനായി ജീവൻ ബലിയർപ്പിച്ച നാവികസേനയിലെ വീരന്മാർക്ക് മുതിർന്ന ഉദ്യോഗസ്ഥരുൾപ്പെടെ നിരവധി പേർ ആദരാഞ്ജലി അർപ്പിച്ചു.
ചെന്നൈയിൽ നടന്ന സ്വാതന്ത്ര്യദിനഘോഷത്തിന്റെ ഭാഗമായി കോസ്റ്റ് ഗാർഡ് തിരംഗ ബോട്ട് റാലി നടത്തി. മത്സ്യത്തൊഴിലാളികൾക്കും നാട്ടുകാർക്കും വിദ്യാർത്ഥികൾക്കും ദേശീയ പതാക വിതരണം ചെയ്തുകൊണ്ടാണ് അവർ ഹർഘർ തിരംഗ ആഘോഷിച്ചത്. പാമ്പൻ പാലം, രാമേശ്വരം ക്ഷേത്രം, ധനുഷ്കോടി, ഇന്തോ-ശ്രീലങ്ക ഇന്റർനാഷണൽ മാരിടൈം ബൗണ്ടറി ലൈൻ തുടങ്ങിയ ഐക്കോണിക് സ്ഥലങ്ങളിലും കോസ്റ്റ് ഗാർഡ് സ്വാതന്ത്ര്യദിനം ആഘോഷിച്ചു.
