ഇന്ദ്രജിത്ത് ലക്ഷ്മണനാൽ വധിക്കപ്പെട്ട വിവരം ശ്രീരാമനെ അറിയിച്ചപ്പോൾ ശ്രീരാമന്റെ പ്രതികരണം
“ദുഷ്കരമെത്രയും നീ ചെയ്ത കാരിയം
രാവണി യുദ്ധേ മരിച്ചതു കാരണം
രാവണൻതാനും മരിച്ചാനറിക നീ
ക്രുദ്ധനായ് നമ്മോടു യുദ്ധത്തിനായ് വരും
പുത്രശോകത്താലിനി ദശഗ്രീവനും.”.… എന്നായിരുന്നു..
മേഘനാദനും മരിച്ചത് അറിഞ്ഞതോടെ രാവണൻ ഒരു മാനസികരോഗിയുടെ ഭാവത്തിലായി. ഒടുവിൽ സർവ്വ സന്നാഹങ്ങളും കൂട്ടി വിജയം അല്ലെങ്കിൽ മരണം എന്ന ഭാവത്തിൽ ആക്രമണത്തിന് ഒരുങ്ങി. രഥത്തിൽ അഹങ്കാരത്തോടെ ഇരുന്നുള്ള രാവണന്റെ യുദ്ധം കടുത്തപ്പോൾ ശ്രീരാമൻ ഒപ്പം എത്താൻ അല്പം ബുദ്ധിമുട്ടി. എന്നാൽ ദേവേന്ദ്രൻ തന്റെ തേരുമായി തേരാളി മാതലിയെ ശ്രീരാമന്റെ സഹായത്തിന് അയച്ചതോടെ അവിടെ രാവണൻ പതറി.
ഇടയ്ക്ക് വിഭീഷണനെ കണ്ട രാവണൻ കൂടുതൽ ദേഷ്യത്തോടെ ദിവ്യമായ വേൽ കയ്യിലെടുത്തു. അതുകണ്ട് ലക്ഷ്മണൻ പെട്ടെന്ന് വിഭീഷണനെ പുറകിൽ ആക്കി മുന്നോട്ടുവന്നു. വിഭീഷണനെ രക്ഷിച്ചെങ്കിലും വേൽ ലക്ഷ്മണന്റെ നെഞ്ചിൽ തുളഞ്ഞു കയറി. ഇത് കണ്ട് ശ്രീരാമനും തളർന്നു.
എന്നാൽ മുറിവ് ഭയാനകമല്ലെന്നും പെട്ടെന്നുതന്നെ ലക്ഷ്മണൻ എഴുന്നേറ്റ് വരുമെന്നും വാനര വൈദ്യൻ സുഷേണൻ വ്യക്തമാക്കിയതോടെ ശ്രീരാമൻ അൽപം ആശ്വാസം പകർന്നു.സുഷേണൻ ഹനുമാനെ നിയോഗിച്ച് ഔഷധം കൊണ്ടുവന്നു. ലക്ഷ്മണൻ വീണ്ടും ഊർജ്ജസ്വലനായി ലക്ഷ്മണനെ ചൊല്ലി ശ്രീരാമൻ തളർന്നിരിക്കുന്നത് കണ്ടപ്പോൾ വിഷമം തോന്നിയ അനുജൻ ജേഷ്ഠനെ ആശ്വസിപ്പിച്ചു. ജ്യേഷ്ഠന്റെ കർത്തവ്യത്തെക്കുറിച്ച് കുറിച്ച് ഓർമിപ്പിച്ചു. ശ്രീരാമൻ അവതാരമാണെന്ന് മട്ടിൽ ഒരു അനുസ്മരണം അതിൽ ഉണ്ടായിരുന്നു.
തുടർന്ന് യുദ്ധക്കളത്തിൽ ശ്രീരാമൻ ഏറെ ശോഭിച്ചു. രാവണന്റെ ഓരോ ശിരസ്സ് അറുത്തിടുമ്പോഴും പുതിയ ശിരസ് മുളച്ചു വരികയായിരുന്നു. ഇത് കണ്ട് വിഷമിച്ച ശ്രീരാമന്റെ രഥത്തിൽ അഗസ്ത്യ മഹർഷി വന്നിറങ്ങി “ആദിത്യഹൃദയം” എന്ന മഹാ മന്ത്രം ഉപദേശിച്ചു. ആ മന്ത്രം മൂന്നുവട്ടം ജപിച്ചിട്ട് ഇറങ്ങിയാൽ കാര്യ തടസ്സം മാറുമെന്ന് ഫലശ്രുതിയും പറഞ്ഞുകൊടുത്തു. പിന്നീട് യുദ്ധം തുടർന്നപ്പോൾ തേരാളി മാതാലി ആദിത്യഹൃദയ മന്ത്രത്തിന്റെ കാര്യം ഓർമിപ്പിച്ചു
ശ്രീരാമൻ മൂന്നുവട്ടം ആദിത്യഹൃദയം ജപിച്ച ശേഷം ബ്രഹ്മാസ്ത്രമെയ്ത് രാവണനെ ഹനിച്ചു. കുല ദേവതാ നമസ്കാരം എല്ലാവരുടെയും കർത്തവ്യമാണ് എന്നും എല്ലാവരും സൂര്യപ്രകാശത്തിന് നന്ദിയുള്ളവരായിരിക്കണം എന്നും ആണ് ഇതിന്റെ സാരാംശം.സൂര്യവംശത്തിന്റെ മൂലകുലദേവതയാണ് ആദിത്യൻ ആദിത്യന്റെ ഹൃദയസ്ഥാനത്ത് ഹൃദയത്തിനകത്ത് ലയിച്ചു നിന്നുള്ള ആക്രമണ പദ്ധതിയിലാണ് രാവണൻ കൊല്ലപ്പെട്ടത് ഒരിക്കലും വംശത്തെ മറക്കരുത്.
എഴുതിയത്
എ പി ജയശങ്കർ
ഫോൺ : 9447213643
ശ്രീ എ പി ജയശങ്കർ എഴുതിയ രാമായണ തത്വ വിചാരത്തിന്റെ മറ്റു ഭാഗങ്ങൾ വായിക്കാൻ ഈ ലിങ്കിൽ ക്ലിക്ക് ചെയ്യുക
https://janamtv.com/tag/ramayana-thatwavicharam/
Comments