ധ്യാൻ ശ്രീനിവാസൻ നായകനാകുന്ന ജയിലർ എന്ന ചിത്രം തിയേറ്ററുകളിൽ എത്തി. കേരളത്തിൽ 85 സ്ക്രീനുകളിലാണ് ചിത്രം ഇന്നുമുതൽ പ്രദർശനം ആരംഭിക്കുന്നത്. ജിസിസിയിൽ 40 കേന്ദ്രങ്ങളിലാണ് റിലീസ്. സക്കീർ മഠത്തിൽ ആണ് ചിത്രത്തിന്റെ സംവിധാനം നിർവഹിച്ചിരിക്കുന്നത്. സിനിമയുടെ പേര് സൂചിപ്പിക്കുന്നത് പോലെ ഒരു ജയിലറുടെ വേഷത്തിലാണ് നായകനായ ധ്യാൻ എത്തുന്നത്. പിരീഡ് ത്രില്ലർ വിഭാഗത്തിൽ പെടുന്ന ചിത്രം 1956-57 കാലഘട്ടത്തിൽ നടന്ന ഒരു സംഭവകഥയാണ് വരച്ചുകാട്ടുന്നത്.
ഗോൾഡൻ വില്ലേജിന്റെ ബാനറിൽ എൻ കെ മുഹമ്മദ് ആണ് ചിത്രം നിർമ്മിക്കുന്നത്. ദിവ്യ പിള്ളയാണ് ചിത്രത്തിൽ നായിക. മനോജ് കെ ജയൻ, ശ്രീജിത്ത് രവി, നവാസ് വള്ളിക്കുന്ന്, ബിനു അടിമാലി, ഉണ്ണി രാജ, ജയപ്രകാശ്, ബി കെ ബൈജു, ശശാങ്കൻ, ടിജു മാത്യു, ശാന്തകുമാരി, ആൻസി വിനീഷ, ബാല താരങ്ങളായ വാസുദേവ് സജീഷ് മരാർ, സൂര്യദേവ് സജീഷ് മാരാർ തുടങ്ങിയവരും ചിത്രത്തിൽ അണിനിരക്കുന്നു.
നേരത്തെ ഇതേ പേരിലുള്ള രജനികാന്തിന്റെ തമിഴ് ചിത്രവുമായി പേരിനെ ചൊല്ലിയുള്ള തർക്കം വാർത്തകളിൽ ഇടംനേടിയിരുന്നു. രജനികാന്ത് ചിത്രത്തിന്റെ റീലീസിന്റെ അതേദിവസം തന്നെ ഈ ചിത്രവും തിയേറ്ററുകളിൽ എത്തിക്കാനാണ് നിർമ്മാതാക്കൾ ആദ്യം തീരുമാനിച്ചിരുന്നത്. എന്നാൽ പിന്നീട് ക്ലാഷ് ഒഴിവാക്കാനായി ചിത്രത്തിന്റെ റിലീസ് മാറ്റിവച്ചതായി അണിയറക്കാർ അറിയിച്ചിരുന്നു. അതേസമയം തമിഴ് ജയിലർ കേരളത്തിലും മികച്ച പ്രദർശനവിജയത്തോടെ ജൈത്രയാത്ര തുടരുകയാണ്.
Comments