ഉപയോക്താക്കൾക്ക് മികച്ച ആനുകൂല്യങ്ങൾ നൽകുന്ന ജിയോ വളരെ കുറഞ്ഞ കാലയളവിലാണ് മറ്റു കമ്പനികളെ പിന്നിലാക്കി മുൻനിരയിലെത്തിയത്. ആദ്യം സൗജന്യമായും ശേഷം കുറഞ്ഞ ഡാറ്റാ പ്ലാനുകളും നൽകിയാണ് ജിയോ ഉപയോക്താക്കളെ ആകർഷിച്ചത്. എന്നാൽ ഇപ്പോൾ ജിയോയുടെ കുറഞ്ഞ നിരക്കുകളിലൊന്നായ 119 രൂപയുടെ പ്രീപെയ്ഡ് പ്ലാനൻ അവസാനിപ്പിക്കാൻ ഒരുങ്ങുകയാണ് കമ്പനി.
119 രൂപയുടെ പ്ലാൻ
ജിയോ അവതരിപ്പിച്ച 119 രൂപയുടെ പ്രീപെയ്ഡ് പ്ലാൻ 14 ദിവസത്തെ വാലിഡിറ്റിയായിരുന്നു നൽകിയിരുന്നത്. ഈ പ്ലാനിലൂടെ പ്രതിദിനം 1.5 ജിബി ഡാറ്റയും ഉപയോക്താക്കൾക്ക് ലഭിച്ചിരുന്നു. കൂടാതെ 100 എസ്എംഎസുകൾ ദിവസവും അയയ്ക്കാനും അൺലിമിറ്റഡ് വോയിസ് കോളിംഗ് ആനുകൂല്യങ്ങളുമാണ് ഈ പ്ലാനിലൂടെ ഉപയോക്താക്കൾക്ക് ജിയോ നൽകിയിരുന്നത്.
റീചാർജ് ചെയ്യേണ്ട അവസരത്തിൽ അധികം പണം കൈയ്യിലില്ലാത്ത ആളുകൾക്ക് തിരഞ്ഞെടുക്കാവുന്ന മികച്ച പ്ലാനായിരുന്നു 119 രൂപയുടെ പ്ലാൻ. ഇതാണ് ഇപ്പോൾ ജിയോ നിർത്തലാക്കിയിരിക്കുന്നത്.
149 രൂപയുടെ കുറഞ്ഞ പ്ലാൻ
119 രൂപയുടെ ജിയോ പ്ലാൻ അവസാനിപ്പിച്ചതോടെ 149 രൂപയുടെ പ്ലാനാണ് ഇനി ഏറ്റവും കുറഞ്ഞ നിരക്കിൽ ഉപയോക്താക്കൾക്ക് ലഭിക്കുക. 20 ദിവസത്തെ വാലിഡിറ്റിയോടെയാണ് 149 രൂപ പ്രീപെയ്ഡ് പ്ലാൻ വരുന്നത്. ഈ പ്ലാനിലൂടെ ഉപയോക്താക്കൾക്ക് അൺലിമിറ്റഡ് വോയിസ് കോളിംഗ് ആനുകൂല്യങ്ങൾ ലഭിക്കും. കൂടാതെ പ്രതിദിനം 1ജിബി ഡാറ്റയാണ് 149 രൂപയുടെ പ്ലാൻ നൽകുന്നത്.
