നൂഹ് : മതമൗലികവാദികൾ ആക്രമണം അഴിച്ചുവിട്ട് മുടക്കിയ ശോഭാ യാത്ര വീണ്ടും നടത്താൻ ഹിന്ദു സംഘടനകൾ . നാളെ ശോഭായാത്ര നടത്താനുള്ള ഒരുക്കങ്ങൾ നടത്തുകയാണ് . നൂഹിൽ, കഴിഞ്ഞ മാസം 31 ന്, ഹിന്ദു സംഘടനകൾ ശോഭാ യാത്ര നടത്തിയിരുന്നു . ഇതിനിടെയാണ് യാത്രയ്‌ക്ക് നേരെ കല്ലേറുണ്ടായത്. എന്നാൽ തോറ്റ് പിന്മാറാതെ ശോഭായാത്ര പൂർത്തിയാക്കുമെന്ന് വിശ്വഹിന്ദു പരിഷത്ത് വ്യക്തമാക്കിയിരുന്നു .സംഭവത്തെ തുടർന്ന് ഹരിയാനയുടെ മറ്റ് ഭാഗങ്ങളിലേക്കും അക്രമം വ്യാപിപ്പിക്കാൻ ശ്രമം നടന്നിരുന്നു.
സർവ് ദേശീയ ഹിന്ദു മഹാപഞ്ചായത്താണ് നാളെ ശോഭായാത്രയ്‌ക്ക് ആഹ്വാനം ചെയ്തിരിക്കുന്നത് .ശോഭയാത്ര’ ആഹ്വാനത്തെ തുടർന്ന് കനത്ത സുരക്ഷാ ക്രമീകരണങ്ങൾ ഏർപ്പെടുത്തി. അർദ്ധസൈനിക വിഭാഗങ്ങൾ ഉൾപ്പെടെയുള്ള സുരക്ഷാ ഉദ്യോഗസ്ഥരെ വിന്യസിച്ചിട്ടുണ്ട്, അന്തർ സംസ്ഥാന, അന്തർ ജില്ലാ അതിർത്തികളിലും സുരക്ഷ ശക്തമാക്കിയിട്ടുണ്ട് . അനിഷ്ട സംഭവങ്ങൾ ഉണ്ടാകാതിരിക്കാൻ ക്രമീകരണങ്ങൾ ഒരുക്കിയിട്ടുണ്ടെന്ന് അഡീഷണൽ ഡയറക്ടർ ജനറൽ ഓഫ് പോലീസ് (ലോ ആൻഡ് ഓർഡർ) മംമ്ത സിംഗ് പറഞ്ഞു.
