ഏകദിന ലോകകപ്പിനൊരുങ്ങുന്ന ഓസ്ട്രേലിയന് ടീമിന് വമ്പന് തിരിച്ചടി. കണങ്കാലിന് പരിക്കേറ്റ സ്റ്റാര് ബാറ്റര് ഗ്ലെന് മാക്സ്വെല് ദക്ഷിണാഫ്രിക്കയ്ക്കെതിരെയുള്ള ടി20 പരമ്പരയില് നിന്ന് പുറത്ത്. താരത്തിന് പകരമായി മാത്യു വെയ്ഡിനെ ഉള്പ്പെടുത്തി. ഇടതു കണങ്കാലിന് പരിക്കേറ്റ താരത്തിന്റെ ലോകകപ്പ് പങ്കാളിത്തം ഇതോടെ അനിശ്ചിതത്വത്തിലായി. 30-നാണ് ടി20 പരമ്പര ആരംഭിക്കുന്നത്. ഇതിന് ശേഷം അഞ്ചുമത്സരങ്ങളടങ്ങുന്ന ഏകദിന പരമ്പരയും നടക്കുന്നുണ്ട്.
വിദഗ്ധ പരിശോധനകള്ക്കും സ്കാനിംഗിനും ശേഷമാണ് താരത്തെ പരമ്പരയില് നിന്നൊഴിവാക്കാന് ക്രിക്കറ്റ് ഓസ്ട്രേലിയ തീരുമാനിച്ചത്. ലോകകപ്പ് ആരംഭിക്കാന് ഒരുമാസം ശേഷിക്കേയാണ് മുന് ചാമ്പ്യന്മാര്ക്ക് തിരിച്ചടിയുണ്ടായത്.മധ്യനിരയിലെ കൂറ്റന് അടിക്കാരനും ഹാന്ഡി സ്പിന്നറുമായ താരത്തിന്റെ അഭാവം കങ്കാരുപ്പടയ്ക്ക് വലിയ തിരിച്ചടിയാകും.
പരിക്കേറ്റ താരം ഭാര്യയ്ക്കൊപ്പം നാട്ടിലേക്ക് മടങ്ങി. ഇരുവരും ആദ്യകുഞ്ഞിനെ വരവേല്ക്കാന് ഒരുങ്ങുകയാണ്. താരത്തിന് പരിക്കില് നിന്ന് മുക്തനാകാന് കുറച്ചധികം സമയം എടുത്തേക്കുമെന്നാണ് വിവരം. സുഹൃത്തിന്റെ പാര്ട്ടിയില് ഡാന്സ് ചെയ്യുന്നതിനിടെ താരത്തിന്റെ കാലിന് കഴിഞ്ഞ വര്ഷവും പരിക്കേറ്റിരുന്നു. അതേസമയം അടുത്ത മാസം നടക്കുന്ന ഇന്ത്യയ്ക്കെതിരെയുള്ള പരമ്പരയില് മാക്സ്വെല് ഉണ്ടാകുമെന്ന് സെലക്ടര് ഡോഡെമെയ്ഡ് പറഞ്ഞു.
