തൃശ്ശൂർ: ചാവക്കാട് കടപ്പുറം മുനക്കക്കടവിൽ നിന്നും വ്യാജ മദ്യം പിടിച്ചെടുത്ത് എക്‌സൈസ്. കടപ്പുറം മുനയ്‌ക്കകടവിൽ വീട്ടിൽ വിൽപ്പനയ്‌ക്കായി സൂക്ഷിച്ചിരുന്ന വ്യാജ മദ്യമാണ് ഉദ്യോഗസ്ഥർ പിടികൂടിയത്. 26.5 ലിറ്റർ വ്യാജ മദ്യവും 11 ലിറ്റർ ഇന്ത്യൻ നിർമ്മിത വിദേശ മദ്യവും പിടികൂടി കസ്റ്റഡിയിലെടുത്തു. സംഭവത്തിൽ കടപ്പുറം അഴിമുഖം സ്വദേശി ഉണ്ണികോച്ചൻ മോഹനനെ പോലീസ് അറസ്റ്റ് ചെയ്തു. എക്‌സൈസ് ഇന്റലിജൻസ് ബ്യൂറോ നൽകിയ രഹസ്യ വിവരത്തെ തുടർന്ന് നടത്തിയ പരിശോധനയിലായിരുന്നു ഇയാളുടെ പക്കൽ നിന്നും ഉദ്യോഗസ്ഥർ വ്യാജമദ്യം പിടികൂടിയത്.
അതേസമയം ഓണക്കാലമായതോടുകൂടി തമിഴ്നാട്ടിൽ നിന്നും കേരളത്തിലേക്ക് വ്യാപകമായി വ്യാജ മദ്യം ഒഴുകുകയാണെന്നാണ് പോലീസ് പറയുന്നത്. ചെറിയ വാഹനങ്ങളിലാക്കി അതിർത്തി ഗ്രാമങ്ങൾ കേന്ദ്രീകരിച്ചാണ് സ്പിരിറ്റ് കടത്ത് നടക്കുന്നത്. കോയമ്പത്തൂരിൽ നിന്നും സ്പിരിറ്റ് ശേഖരിച്ച് പോലീസിനെ കബളിപ്പിച്ച് അതിർത്തി വഴി കടത്തിയാണ് സംസ്ഥാനത്ത് കച്ചവടം നടത്തുന്നത്.
