ഇന്ന് തിരുവോണം. സമൃദ്ധിയുടെയും നന്മയുടെയും പൂവിളിയുമായെത്തിയ തിരുവോണം ഒത്തുചേരലിന്റേയും ഓർമ്മപ്പെടുത്തലിന്റേയും ദിനം കൂടിയാണ്. ഇപ്പോഴിതാ ലോകമെമ്പാടുമുളള മലയാളികൾക്ക് തിരുവോണാശംസകൾ അറിയിച്ചിരിക്കുകയാണ് മലയാളത്തിൽ ഏറെ ആരാധകരുള്ള തെന്നിന്ത്യൻ താരവും ദേശീയ പുരസ്‌കാരജേതാവ് കൂടിയായ അല്ലു അർജുൻ.
സമൂഹമാദ്ധ്യമത്തിലൂടെയാണ് മലയാളികളുടെ സ്വന്തം മല്ലു അർജുൻ ആശംസ നേർന്നിരിക്കുന്നത്. ‘സന്തോഷത്തിന്റെ സമൃദ്ധിയുടെയും ഈ ഓണക്കാലത്ത് ഏവർക്കും ഹൃദയം നിറഞ്ഞ ഓണാശംസകൾ.’- എന്ന് താരം മലയാളത്തിൽ കുറിച്ചു. ആശംസാപോസ്റ്റിന് താഴെ നിരവധി ആരാധകരാണ് കമന്റ് നൽകിയിരിക്കുന്നത്.
‘പുഷ്പ: ദി റൈസ്’എന്ന ബ്ലോക്ക്ബസ്റ്റർ ചിത്രത്തിലെ പ്രകടനത്തിനാണ് മികച്ച നടനുള്ള ദേശീയ പുരസ്‌കാരം അല്ലു അർജുൻ നേടിയത്. താരം ഇപ്പോൾ പുഷ്പ 2 അഥവാ ‘പുഷ്പ: ദി റൂൾ’ എന്ന ചിത്രത്തിന്റെ തിരക്കിലാണ്. എന്നാൽ ചിത്രത്തിന്റെ റിലീസ് തീയതി സംബന്ധിച്ച് ഇതുവരെ ഔദ്യോഗിക പ്രഖ്യാപനമൊന്നുമുണ്ടായിട്ടില്ല.
അതേസമയം മലയാളത്തിന്റെ പ്രിയതാരങ്ങളും ആശംസ അറിയിച്ച് രംഗത്തുവന്നിരുന്നു. പ്രിയപ്പെട്ടവർക്കുള്ള ആശംസകൾക്കൊപ്പം ഓണക്കോടിയിൽ തിളങ്ങിയ ചിത്രങ്ങളും താരങ്ങൾ പങ്കുവെച്ചു. മലയാള സിനിമയുടെ താരരാജാവ് മോഹൻലാൽ ഓണശംസകൾ നേർന്നുകൊണ്ടുള്ള ഒരു വീഡിയോ ആണ് പങ്കുവെച്ചത്. മോഹൻലാലിനെ കൂടാതെ മെഗാസ്റ്റാർ മമ്മൂട്ടി, ജനപ്രിയതാരം ദിലീപ്, മലയാളികളുടെ പ്രിയ താരം ഉണ്ണിമുകുന്ദൻ അടക്കം കുഞ്ചാക്കോ ബോബൻ, ടൊവിനോ തോമസ്, അജു വർഗ്ഗീസ്, ദുൽഖർ സൽമാൻ, നടിമാരായ അഹാനാ, അമലാപോൾ, അനുശ്രീ, അനിഘ സുരേന്ദ്രൻ, ശ്രിന്ദ അർഹാൻ എന്നിവരും ആശംസകൾ നേർന്നു. സമൂഹമാദ്ധ്യമത്തിലൂടെ ഓണവിശേഷങ്ങളും താരങ്ങൾ പങ്കുവെച്ചിരുന്നു.
നടി അഹാനാ കൃഷ്ണൻ അമ്മയ്‌ക്കും സഹോദരിമാർക്കും ഒപ്പമുള്ള മനോഹര ചിത്രങ്ങൾ പങ്കുവെച്ചിരുന്നു. നടി അമലാപോളും വീഡിയോയിലൂടെയായിരുന്നു ആളംസകൾ നേർന്നത്. കേരളസാരിയിലുള്ള ചിത്രങ്ങളും പങ്കുവെച്ചാണ് നടി അനുശ്രീ ആരാധകർക്ക് ആശംസകൾ അറിയിച്ചത്. ഇവരെ കൂടാതെ നടിമാരായ അനിഘ സുരേന്ദ്രൻ, ശ്രിന്ദ അർഹാൻ തുടങ്ങിയ വരും മലയാളികൾക്ക് ആശംസകൾ അറിയിച്ചു.
