ജി20 ഉച്ചകോടിക്ക് സാക്ഷ്യം വഹിക്കാനൊരുങ്ങിയിരിക്കുകയാണ് ഡൽഹി നഗരം. 20 അംഗരാജ്യങ്ങളടക്കം 40 രാജ്യങ്ങളിൽ നിന്നുള്ള നേതാക്കളും പ്രതിനിധികളുമാണ് എത്തുന്നത്. പ്രഗതി മൈതാനിലെ അത്യാധുനിക ഭാരത് മണ്ഡപം കൺവെൻഷൻ സെന്ററിലാണ് ജി20 ഉച്ചകോടി സംഘടിപ്പിക്കുന്നത്.
ഇതിന്റെ ഭാഗമായി വൻ പദ്ധതിയാണ് ഡൽഹി മെട്രോയും സജ്ജമാക്കിയിരിക്കുന്നത്. പരിധിയില്ലാത്ത യാത്രകളാണ് സന്ദർശകർക്കായി ഒരുക്കിയിരിക്കുന്നത്. 36 സ്റ്റേഷനുകളിലും ഈ സംവിധാനം ഒരുക്കിയിട്ടുണ്ട്. സെപ്റ്റംബർ നാല് മുതൽ 13 വരെയാണ് ‘ടൂറിസ്റ്റ് സ്മാർട്ട് കാർഡ്’ ലഭ്യമാകുക. ഒരു ദിവസത്തെ വാലിഡിറ്റി, മൂന്ന് ദിവസത്തെ വാലിഡിറ്റി എന്നിങ്ങനെ രണ്ട് വിഭാഗങ്ങളിലായി കാർഡ് ലഭിക്കും. എല്ലാ ദിവസങ്ങളിലും കാർഡ് വിതരണം ചെയ്യുന്നുണ്ടെങ്കിലും ജി20 ഉച്ചകോടി കണക്കിലെടുത്ത് പത്ത് ദിവസത്തേക്കായി പ്രത്യേക കൗണ്ടറുകൾ തുറന്നതായി അധികൃതർ അറിയിച്ചു.
ഒരു ദിവസത്തെ കാലാവധിയുള്ള ടൂറിസ്റ്റ് സ്മാർട്ട് കാർഡിന് 200 രൂപയാണ് വില. 500 രൂപ നൽകിയാൽ മൂന്ന് ദിവസത്തേക്കുള്ള കാർഡ് ലഭിക്കുന്നതാണ്. തുകയിൽ 50 രൂപ സെക്യൂരിറ്റി ഡെപ്പോസിറ്റാണ്. സ്ഥിരം സ്റ്റേഷനുകൾക്ക് പുറമേ കശ്മീർ ഗേറ്റ്, ചാന്ദ്നി ചൗക്ക്, ചാവ്രി ബസാർ, ന്യൂഡൽഹി, രാജീവ് ചൗക്ക്, പട്ടേൽ ചൗക്ക്, സെൻട്രൽ സെക്രട്ടേറിയറ്റ്, ഉദ്യോഗ് ഭവൻ, ലോക് കല്യാൺ മാർഗ്, സുപ്രീം കോടതി എന്നീ സ്റ്റേഷനുകളിൽ നിന്നും ടൂറിസ്റ്റ് കാർഡ് സ്വന്തമാക്കാവുന്നതാണ്.
