കങ്കണ റണാവത്തും രാഘവ ലോറൻസും പ്രധാനവേഷത്തിലെത്തുന്ന ‘ചന്ദ്രമുഖി 2’ വിന്റെ ട്രെയിലർ പുറത്തിറങ്ങി. പ്രേക്ഷകരെ ആവേശത്തിലാഴ്ത്തുന്ന നിരവധി രംഗങ്ങളും കഥാമുഹൂർത്തങ്ങളും ചിത്രത്തിൽ കാണുമെന്ന് ഉറപ്പുവരുത്തുന്നതാണ് ഇപ്പോൾ പുറത്ത് വന്ന ട്രെയിലർ. ചുരുങ്ങിയ സമയംകൊണ്ട് ഏഴ് ലക്ഷത്തിലേറെ പേരാണ് യൂട്യൂബിൽ ട്രെയിലർ കണ്ടത്. രാഘവ ലോറൻസിന്റെയും കങ്കണ റണാവത്തിന്റെയും ഉൾപ്പടെയുള്ള മികച്ച പ്രകടനങ്ങളാണ് പ്രേക്ഷകരെ കാത്തിരിക്കുന്നതെന്ന സൂചനയും ട്രെയിലർ തരുന്നുണ്ട്.
ലൈക്ക പ്രൊഡക്ഷൻസിന്റെ ബാനറിൽ സുബാസ്കരൻ നിർമിച്ച് പി. വാസു സംവിധാനംചെയ്യുന്ന ചിത്രം സെപ്റ്റംബർ 15-ന് തിയേറ്ററുകളിലെത്തും. ആർ ഡി രാജശേഖർ ഛായാഗ്രഹണം നിർവ്വഹിക്കുന്ന സിനിമയുടെ ചിത്രസംയോജനം ആന്റണി കൈകാര്യം ചെയ്യുന്നു. യുഗ ഭാരതി, മദൻ കാർക്കി, വിവേക്, ചൈതന്യ പ്രസാദ് എന്നിവരുടെ വരികൾക്ക് ഓസ്കാർ ജേതാവ് എം. എം കീരവാണിയാണ് സംഗീതം പകർന്നിരിക്കുന്നത്.ദേശീയ അവാർഡ് ജേതാവ് തോട്ട തരണി പ്രൊഡക്ഷൻ ഡിസൈനറായി പ്രവർത്തിച്ച ഈ ചിത്രത്തിൽ വടിവേലു, ലക്ഷ്മി മേനോൻ, മഹിമ നമ്പ്യാർ, രാധിക ശരത് കുമാർ, വിഘ്നേഷ്, രവിമരിയ, സൃഷ്ടി ഡാങ്കെ, സുഭിക്ഷ, വൈ ജി മഹേന്ദ്രൻ, റാവു രമേഷ്, സായ് അയ്യപ്പൻ, സുരേഷ് മേനോൻ, ശത്രു, ടി എം കാർത്തിക് എന്നിവരാണ് മറ്റ് സുപ്രധാന കഥാപാത്രങ്ങളെ അവതരിപ്പിക്കുന്നത്. പി വാസുവിന്റെ 65-മത്തെ ചിത്രം കൂടിയാണ് ‘ചന്ദ്രമുഖി 2’. ആർ ഡി രാജശേഖർ ആണ് ചിത്രത്തിന്റെ ഛായാഗ്രാഹകൻ.
മലയാളത്തിലെ എക്കാലത്തെയും വലിയ സൂപ്പർ ഹിറ്റുകളിലൊന്നായ മണിച്ചിത്രത്താഴിന്റെ തമിഴ് പതിപ്പായ ചന്ദ്രമുഖിയുടെ രണ്ടാംഭാഗമാണ് ചിത്രം. രജനീകാന്ത്, ജ്യോതിക, പ്രഭു, നയൻതാര എന്നിവർ കേന്ദ്ര കഥാപാത്രങ്ങളെ അവതരിപ്പിച്ച ‘ചന്ദ്രമുഖി’ 2005 ഏപ്രിൽ 14-നാണ് റിലീസ് ചെയ്തത്.
Comments