സന്തോഷങ്ങളിലും ദുഃഖങ്ങളിലും അവൻ ഒപ്പമുണ്ടായിരുന്നു..! പക്ഷേ പിഎസ്ജി സമ്മാനിച്ചത് നരകതുല്യമായ അനുഭവം; വെളിപ്പെടുത്തി നെയ്മർ

പിഎസ്ജിക്കെതിരെ രൂക്ഷ വിമർശനവുമായി ബ്രസീലിയൻ സൂപ്പർതാരം നെയ്മർ. നരക തുല്യമായ ജീവിതമാണ് എനിക്കും മെസിക്കും പിഎസ്ജിയിൽ അനുഭവിക്കേണ്ടി വന്നതെന്നാണ് താരം പറഞ്ഞത്.

ബാഴ്‌സയിൽ ഇരുവരും ഒരുമിച്ചായിരുന്നു. തുടർന്ന് പിഎസ്ജിയിലും ഇരുവരും സഹതാരങ്ങളായിരുന്നു. മെസി കൂടെയുണ്ടായിരുന്ന സമയത്ത് ഞാൻ വളരെയധികം സന്തോഷവാനായിരുന്നു. സന്തോഷങ്ങളിലും ദുഃഖങ്ങളിലും മെസി എനിക്കൊപ്പമുണ്ടായിരുന്നു. അർജന്റീനയ്‌ക്കൊപ്പം മെസി അതീവ സന്തോഷവാനായിരുന്നു. അർജന്റൈയ്ൻ ദേശീയ ടീമിനായി എല്ലാ കിരീടങ്ങളും നേടി. എന്നാൽ പിഎസ്ജിക്കൊപ്പം അവൻ ജീവിച്ചത് നരകത്തിലാണ് നെയ്മർ പറഞ്ഞു. മെസിയും നേരത്തെ ക്ലബ്ബിനെതിരെ രംഗത്ത് വന്നിരുന്നു.

പിഎസ്ജിക്കായി ഞങ്ങൾ ഇരുവരും സന്തോഷത്തോടെയാണ് പന്തുതട്ടിയത്. കിരീടം നേടുന്നതിനായി ഞങ്ങളുടെ കഴിവിന്റെ പരമാവധി ശ്രമിച്ചു. നിർഭാഗ്യവശാൽ, ഞങ്ങൾക്കതിന് കഴിഞ്ഞില്ല- നെയ്മർ കൂട്ടിച്ചേർത്തു. പിഎസ്ജിയിൽ തനിക്ക് ലഭിച്ചതിനേക്കാൾ മികച്ച വിടവാങ്ങൽ മെസി അർഹിച്ചിരുന്നെന്നും താരം ചൂണ്ടിക്കാട്ടി.

പിഎസ്ജിക്കായുളള അവസാന മത്സരത്തിലും മെസി മനോഹരമായി കളിച്ചു. അവനെ കുറിച്ച് അവനെ അറിയാവുന്നവർക്ക് അറിയാം. ജയിക്കാനായി പരിശീലിക്കുകയും പോരാടുകയും തോറ്റാൽ നിരാശകനാകുകയും ചെയ്യുന്ന ആളാണ്. അതേ സമയം മെസിയും സംഘവും ലോകകപ്പ് നേടിയതിൽ ഞാൻ വളരെ സന്തോഷവാനാണ്. നെയ്മർ പറഞ്ഞു.