മലയാളികൾക്ക് ഏറെ പ്രിയപ്പെട്ട നടിയാണ് നവ്യാനായർ. വിവാഹ ശേഷം സിനിമയിൽ നിന്ന് മാറി നിന്നെങ്കിലും വീണ്ടും സിനിമയിൽ സജീവമായിരിക്കുകയാണ് താരം. അനധികൃതമായി സ്വത്ത് സമ്പാദന കേസിൽ അറസ്റ്റിലായ ഐആർഎസ് ഉദ്യോഗസ്ഥൻ സച്ചിൻ സാവന്ദിന്റെ കേസിൽ ഇഡിയ്ക്ക് മൊഴി നൽകിയതോടെ വിവാദങ്ങളിൽ നിറയുകയാണ് താരം. മുംബൈയിൽ തന്റെ റെസിഡൻഷ്യൽ സൊസൈറ്റിയിലെ താമസക്കാരൻ എന്നത് മാത്രമാണ് സച്ചിൻ സാവന്ദുമായുള്ള പരിചയമെന്ന് നവ്യ ഇഡിയക്ക് മൊഴി നൽകിയിരുന്നു.
മുംബൈയിലെ പരിചയക്കാരൻ എന്ന നിലയ്ക്ക് ഗുരുവായൂരിൽ പോവാൻ താൻ പലവട്ടം സച്ചിൻ സാവന്ദിന് സഹായങ്ങൾ ചെയ്ത് കൊടുത്തിട്ടുണ്ടെന്നും നവ്യാനായർ വ്യക്തമാക്കിയിരുന്നു. എന്നാൽ ഇഡി മൊഴിയെടുത്തതിന് പിന്നാലെ വലിയ സൈബർ ആക്രമണമാണ് നവ്യ നേരിട്ടത്. ഇതിന് പിന്നാലെ നവ്യ പങ്കുവെച്ച ഇൻസ്റ്റഗ്രാം സ്റ്റോറികളും ശ്രദ്ധേയമാവുകയാണ്. നവ്യയ്ക്ക് പിന്തുണ നൽകി ഒരു ആരാധകൻ പങ്കുവച്ച സ്റ്റോറിയാണ് നവ്യ പങ്കിട്ടിരിക്കുന്നത്. നടിയുടെ മറ്റ് നിരവധി ആരാധകരും പോസ്റ്റ് പങ്കുവെച്ചിട്ടുണ്ട്.
‘ഒരു സ്ത്രീ ഇരയായി എത്തുമ്പോൾ അവരുടെ മാതാപിതാക്കളും പങ്കാളിയും കുട്ടികളും എല്ലാം വേദനിക്കുന്നത് സങ്കടകരമാണ്. ഇരയെ സൈബർ ഇടങ്ങളിൽ അപമാനിക്കുന്നത് തീർത്തും പരിതാപകരമായ കാര്യമാണ്. നെല്ലും പതിരും തിരിക്കാതെയാണ് ഓരോ വ്യാജപ്രചരണങ്ങളും നടക്കുന്നത്. ഇത്തരം പ്രചരണങ്ങൾക്കിടിൽ സുഹൃത്തുക്കളുടെ ഇടയിലും ബന്ധുക്കളുടെ ഇടയിലും ഇര ഒറ്റപ്പെടും. അവരുടെ മനസമാധാനം തന്നെ നഷ്ടമാകും. ഒരു വാർത്തയിൽ കൂടി ഇരയെ കീറിമുറിക്കുമ്പോൾ അത് അവരുടെ ചുറ്റിലുമുള്ളവരെക്കൂടിയാണ് ബാധിക്കുന്നത് എന്ന് ഓർക്കണം’. എന്നായിരുന്നു ആരാധകന്റെ പോസ്റ്റ്.
നേരത്തെ വാർത്തകൾ വന്ന സമയത്ത് നടി നവ്യ നായരുടെ ഇൻസ്റ്റഗ്രാം പോസ്റ്റും ചർച്ചയായിരുന്നു. നിങ്ങളിൽ പാപം ചെയ്യാത്തവർ കല്ലെറിയട്ടെ എന്ന ഹാഷ് ടാഗോടെ പേർഷ്യൻ കവി ജലാലുദ്ദീൻ റൂമിയുടെ വരികളാണ് നവ്യ കുറിച്ചത്. നിങ്ങൾ തകർന്നിരിക്കുമ്പോൾ നൃത്തം ചെയ്യുക. മുറിവിലെ കെട്ട് അഴിഞ്ഞുപോകുമ്പോൾ നൃത്തം ചെയ്യുക. പോരാട്ടങ്ങളുടെ മധ്യേ നൃത്തം ചെയ്യുക. നിങ്ങളുടെ ചോരയിൽ ചവിട്ടി നൃത്തം ചെയ്യുക, എന്നാണ് വരികൾ. ഒപ്പം താൻ നൃത്തം ചെയ്യുന്ന ഒരു വീഡിയോയും നവ്യ പോസ്റ്റിനൊപ്പം ചേർത്തിട്ടുണ്ടായിരുന്നു.
