ടെലികോം രംഗത്ത് വിപ്ലവം കൊണ്ടുവന്ന കമ്പനിയാണ് റിലയൻസ് ജിയോ. ഏഴാം വാർഷികാഘോഷ നിറവിലാണ് ജിയോ ഇന്ന്. ഇതിന്റെ ഭാഗമായി വരിക്കാർക്ക് നിരവധി ഓഫറുകളാണ് ജിയോ നൽകുന്നത്. ഉപഭോക്താക്കൾക്ക് 21 ജിബി വരെ ബോണസ് ഡാറ്റയാണ് കമ്പനി വാഗ്ദാനം ചെയ്യുന്നത്. സെപ്റ്റംബർ അഞ്ച് മുതൽ 30 വരെയുള്ള കാലയളവിലാണ് അധിക ഡാറ്റയും പ്രത്യേക വൗച്ചറും ലഭിക്കുന്നത്.
299, 749,2999 രൂപയുടെ റീച്ചാർജ് പ്ലാനുകളിലാണ് ഓഫറുകൾ ലഭിക്കുന്നത്. 28 ദിവസത്തെ വാലിഡിറ്റിയുള്ള പ്ലാനാണ് 299 രൂപയുടേത്. പ്രതിദിനം രണ്ട് ജിഹി ഡാറ്റ, അൺലിമിറ്റഡ് കോൾ, പ്രതിദിനം 100 എസ്എംഎസ് എന്നിവയാണ് പ്ലാനിലൂടെ ലഭിക്കുക. എന്നാൽ വാർഷിക ഓഫറിന്റെ ഭാഗമായി 7 ജിബി അധിക ഡാറ്റ ലഭിക്കും.
749 രൂപയുടെ പ്ലാനിൽ പ്രതിദിനം 2 ജിബി ഡാറ്റ, പ്രതിദിനം 100 എസ്എംഎസ്, 90 ദിവസത്തെ വാലിഡിറ്റിയിൽ അൺലിമിറ്റഡ് കോളും വാഗ്ദാനം ചെയ്യുന്നു. പ്ലാനിനൊപ്പം 14 ജിബി ഡാറ്റയാണ് വരിക്കാർക്ക് അധികമായി ലഭിക്കുക. 2,999 രൂപയുടെ പ്ലാനിൽ പ്രതിദിനം 2.5 ജിബി ഡാറ്റ, അൺലിമിറ്റഡ് കോൾ, പ്രതിദിനം 100 എസ്എംഎസ് എന്നിവയാണ് നൽകുന്നത്. ഏഴാം വാർഷികത്തിന്റെ ഭാഗമായി വരിക്കാർക്ക് അധികമായി 21 ജിബി ഡാറ്റയാണ് ജിയോ വാഗ്ദാനം ചെയ്തിരിക്കുന്നത്.
ഇതിനൊപ്പം അജിയോയിൽ 200 രൂപയുടെ കിഴിവ്, നെറ്റ്മെഡ്സിൽ 20 ശതമാനം കിഴിവ്, സ്വിഗ്ഗിയിൽ 100 രൂപ കിഴിവ്, 149 രൂപയിലധികം രൂപയുടെ ഫുഡ് ഓർഡർ ചെയ്യുമ്പോൾ മക്ഡൊണാൾഡ്സിന്റെ ഫ്രീ മീൽസ്, റിലയൻസ് ഡിജിറ്റലിൽ 10 ശതമാനം കിഴിവ് എന്നിവയും ലഭിക്കും. ഉപഭോക്താവിന്റെ ‘മൈ ജിയോ’ അക്കൗണ്ടിലാണ് ക്രെഡിറ്റ് ചെയ്യപ്പെടുക. റീചാർജിന് പിന്നാലെ ആപ്പിൽ ഡാറ്റാ വൗച്ചറായി ക്രെഡിറ്റ് ചെയ്യപ്പെടും. ഉപയോക്താവ് ഇത് റീഡിം ചെയ്തെടുക്കേണ്ടതാണ്.
