മലയാളത്തിന്റെ മെഗാസ്റ്റാർ മമ്മൂട്ടിയ്ക്ക് ജന്മദിനാശംസകൾ നേർന്ന് നടൻ മോഹൻലാൽ. സമൂഹമാദ്ധ്യമത്തിലൂടെയായിരുന്നു മോഹൻലാൽ ആശംസ അറിയിച്ചത്. പ്രിയപ്പെട്ട ഇച്ചാക്കാ ജന്മദിനാശംസകൾ, എന്നായിരുന്നു മോഹൻലാൽ കുറിച്ചത്. ഇരുവരും ഒരുമിച്ച് ചേർന്നുനിൽക്കുന്ന ചിത്രം പങ്കുവെച്ചായിരുന്നു മോഹൻലാലിന്റെ ആശംസ.
മമ്മൂട്ടിയുടെ 72-ാം പിറന്നാൾ ദിനത്തിൽ നിരവധി പേരാണ് ആശംസകൾ അറിയിച്ചിരിക്കുന്നത്. സിനിമാമേഖലയിൽ നിന്ന് മോഹൻലാൽ, സുരേഷ് ഗോപി, ദിലീപ് അടക്കമുള്ള സഹപ്രവർത്തകരും രാഷ്‌ട്രീയ സാമൂഹിക രംഗത്തുള്ള പ്രമുഖരും സമൂഹമാദ്ധ്യമങ്ങളിലൂടെ അദ്ദേഹത്തിന് ആശംസകൾ അറിയിച്ചു.
പിറന്നാൾ ദിനമായ ഇന്ന് ഫാൻസ് അസോസിയേഷന്റെ നേതൃത്വത്തിൽ സംസ്ഥാനവ്യാപകമായി രക്തദാന ക്യാമ്പുകൾ സംഘടിപ്പിക്കുന്നുണ്ട്. സെപ്റ്റംബർ ഒന്നിന് ആരംഭിച്ച ക്യാമ്പെയ്‌നിൽ ഇതുവരെ ഏഴായിരം രക്തദാനം നടത്തിയതായാണ് കണക്ക്.
അതേസമയം പിറന്നാൾ ദിനത്തിൽ മമ്മൂട്ടിയുടെ ചിത്രത്തിലെ ഫസ്റ്റ് ലുക്ക് പോസ്റ്റർ പുറത്തിറക്കിയിരിക്കുകയാണ് ഭ്രമയുഗം ചിത്രത്തിലെ അണിയറപ്രവർത്തകർ. ‘ഭൂതകാലം’ എന്ന ഹൊറർ ചിത്രത്തിലൂടെ ശ്രദ്ധേയനായ രാഹുൽ സദാശിവൻ സംവിധാനം ചെയ്യുന്ന ചിത്രത്തിൽ മമ്മൂട്ടി പ്രതിനായക വേഷത്തിലാണ് എത്തുന്നതെന്നാണ് സൂചന. നടന്റെ വേറിട്ട ലുക്കിലുള്ള പോസ്റ്റർ ആരാധകർക്കിടയിൽ ചർച്ചയായിക്കഴിഞ്ഞു. മലയാളം, തമിഴ്, തെലുങ്ക്, കന്നഡ, ഹിന്ദി ഭാഷകളിൽ ഒരേസമയമായിരിക്കും ‘ഭ്രമയുഗ’ത്തിന്റെ റിലീസ്.
പിറന്നാൾ ദിന തലേന്ന് ആരാധകരെ ഞെട്ടിച്ചുകൊണ്ട് പുതിയ ലുക്കിലുള്ള ചിത്രം മമ്മൂട്ടി പങ്കുവെച്ചിരുന്നു. ഫെൻസിങ് പോരാളിയായി അണിഞ്ഞൊരുങ്ങി നിൽക്കുന്ന ചിത്രമാണ് മമ്മൂട്ടി സമൂഹമാദ്ധ്യമങ്ങളിലൂടെ പങ്കുവച്ചത്. തൂഷെ’ എന്ന് ചിത്രത്തിന് തലക്കെട്ടും നൽകിയിട്ടുണ്ട്. ഫെൻസിങിൽ എതിരാളിയുടെ നീക്കത്തെ അഭിനന്ദിക്കുന്നതിനുള്ള ഒരു വാക്കാണിത്.
എന്നാൽ ചിത്രത്തോടൊപ്പം സംവിധായകൻ മാർട്ടിൻ പ്രക്കാട്ടിനേയും സെലിബ്രിറ്റി ഫോട്ടോഗ്രാഫർ ഷാനി ഷാകിയേയും ടാഗ് താരം ചെയ്തിട്ടുമുണ്ട്. ഈ മേക്കോവർ പുതിയ സിനിമയ്‌ക്ക് വേണ്ടിയാണോ അതോ ഏതെങ്കിലും പരസ്യത്തിന് വേണ്ടിയാണോ എന്നാണ് ഉപ്പോൾ ആരാധകർക്കിടയിലെ മറ്റൊരു ചർച്ച.
