വൻ ഹൈപ്പുമായി തിയേറ്ററുകളിൽ എത്തിയ ചിത്രമാണ് അറ്റ്ലിയുടെ സംവിധാനത്തിലിറങ്ങിയ ജവാൻ. ആദ്യ ദിവസം തന്നെ ചിത്രത്തിന് സമ്മിശ്ര പ്രതികരണങ്ങളാണ് ലഭിക്കുന്നത്. എന്നാൽ, ചിത്രം തിയേറ്ററിൽ എത്തി മണിക്കൂറുകൾക്കുള്ളിൽ ചിത്രത്തിന്റെ വ്യാജ പതിപ്പ് പ്രചരിച്ചിരിക്കുകയാണ്. ടെലഗ്രാം, ടൊറന്റ്, തമിഴ്റോക്കോഴ്സ് വെബ്സൈറ്റ് പോലുള്ള പ്ലാറ്റ്ഫോമുകളിൽ ചിത്രത്തിന്റെ വ്യാജ പതിപ്പ് പ്രചരിക്കുന്നു എന്നാണ് ദേശീയ മാദ്ധ്യമങ്ങൾ റിപ്പോർട്ട് ചെയ്തിരിക്കുന്നത്.
പുറത്തിറങ്ങിയ ദിവസം തന്നെ വ്യാജ പതിപ്പ് ഓൺലൈനിൽ പ്രചരിക്കുന്നത് ബോക്സോഫീസ് കളക്ഷനെ ബാധിക്കുമെന്ന ആശങ്കയിലാണ് അണിയറപ്രവർത്തകരും. എച്ച് ഡി ക്വാളിറ്റിയിൽ തന്നെയാണ് ചിത്രം ചോർന്നിരിക്കുന്നത്. രാജ്യമൊട്ടാകെ വലിയ രീതിയില് ശ്രദ്ധയാകര്ഷിച്ച ചിത്രവുമായിരുന്നു ജവാൻ.
ചിത്രത്തൽ നാല് ഗെറ്റപ്പിലാണ് ഷാരൂഖ് ഖാൻ എത്തുന്നത്. നയൻതാര നായികയായി എത്തുന്ന ചിത്രത്തിൽ വിജയ് സേതുപതിയാണ് വില്ലൻ വേഷത്തിൽ എത്തുന്നത്. ദീപിക പദുകോൺ അതിഥി വേഷത്തിൽ എത്തുന്നുണ്ട്. പ്രിയ മണി, സന്യ മൽഹോത്ര, യോഗിബാബു തുടങ്ങിയവരാണ് മറ്റു താരങ്ങൾ. ഗോകുലം ഗോപാലന്റെ ഉടമസ്ഥതയിലെ ശ്രീ ഗോകുലം മൂവീസ് ആണ് കേരളത്തിലും തമിഴ് നാട്ടിലും വിതരണം. ഡ്രീം ബിഗ് ഫിലിംസ് ആണ് കേരളത്തിൽ ഡിസ്ട്രിബ്യൂഷൻ പാർട്ണർ.
