വളർത്തു മൃഗങ്ങൾക്ക് വേണ്ടി ധാരാളം പണം ചെലവഴിക്കുന്നവരെ നമുക്കറിയാം. എന്നാൽ പ്രാണികൾക്കുവേണ്ടി ഇത്രയധികം പണം ചെലവഴിക്കുന്നതിനെക്കുറിച്ച് കേട്ടിട്ടുണ്ടോ…! എന്നാൽ അതിന് ഉത്തമ ഉദാഹരണമാണ് സ്റ്റാഗ് വണ്ടുകൾ. ലോകത്തിലെ തന്നെ ഏറ്റവും വിലകൂടിയ പ്രാണിയായ സ്റ്റാഗ് വണ്ടുകൾക്ക് 85,000 ഡോളർ (ഏകദേശം 65 ലക്ഷം ) ആണ് വിപണിയിലെ ഇപ്പോഴത്തെ വില.
രണ്ടോ മൂന്നോ ഇഞ്ച് വലിപ്പമാണ് ഇത്രയും വിലകൂടിയ വണ്ടിന്. കാരണം അപൂർവയിനത്തിൽപ്പെട്ട ഒരു പ്രാണി എന്നതിലുപരി ഭൂമിയിലെ ഏറ്റവും ചെറുതും വിചിത്രവുമായ പ്രാണികളിൽ ഒന്നു കൂടെയാണിത്. ജീർണിച്ച പഴങ്ങളിൽ നിന്നുള്ള മധുരമുള്ള ദ്രാവകമാണ് ഈ വണ്ടുകളുടെ ആഹാരം. ഇതിനുള്ള കാരണം അവയ്ക്ക് മറ്റു ഭക്ഷണങ്ങൾ കഴിക്കാൻ സാധിക്കാത്തതാണ്.
എന്നാൽ ഈ വണ്ടുകളുടെ ലാർവകൾ ജീർണ്ണിച്ച മരക്കഷണങ്ങളാണ് ഭക്ഷിക്കുന്നത്. വെളുത്ത പൂപ്പൽ ബാധിച്ച് ദ്രവിച്ച മരക്കഷണങ്ങളിലെ ഫംഗസുകളെയും ചെറുജീവികളെയും ഇവയുടെ ലാർവകൾ ഭക്ഷണമാക്കാറുണ്ട്. സ്റ്റാഗ് വണ്ടുകളെ ഉപയോഗിച്ച് പലതരത്തിലുള്ള ഔഷധങ്ങൾ നിർമ്മിക്കാറുണ്ട്.
ആൺ വർഗത്തിൽപ്പെട്ട സ്റ്റാഗ് വണ്ടുകൾക്ക് വലിയ താടിയെല്ലുകളാണുള്ളത്. എന്നാൽ പെൺ സ്റ്റാഗ് വണ്ടികളുടെ താടിയെല്ലുകൾ ഇവയെക്കാൾ വളരെ ശക്തമാണ്. പെൺ സ്റ്റാഗ് വണ്ടുകളെ താഴ്ന്ന പ്രതലങ്ങളിലാണ് പലപ്പോഴും കണ്ടുവരുന്നത്. ഒരു സമയം 30 മുട്ടകൾ വരെ ഇവയിടും. വളരെ കാഠിന്യമേറിയ പുറം തോടുകൾക്ക് കീഴിൽ മറഞ്ഞിരിക്കുന്ന ചിറകുകളും സ്റ്റാഗ് വണ്ടുകൾക്ക് ഉണ്ട്.
