ബ്യൂണസ് ഐറീസ്: അർജന്റൈയ്ൻ സൂപ്പർ ഇതിഹാസം വിരമിക്കാൻ ഒരുങ്ങുന്നുവെന്ന് റിപ്പോർട്ടുകൾ. അർജന്റീനയുടെ വിങ്ങർ എഞ്ചൽ ഡി മരിയ വിരമിക്കുന്ന വാർത്ത പുറത്തുവിട്ടിരിക്കുകയാണ് ‘ഇഎസ്പിഎൻ അർജന്റീന’. കോപ്പ അമേരിക്കയ്ക്ക് ശേഷം അർജന്റൈയ്ൻ ജേഴ്സിയിൽ നിന്ന് താരം ഔദ്യോഗികമായി വിരമിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. പതിനഞ്ച് വർഷമായി അർജന്റൈയ്ൻ നിരയിലെ നിർണായക സാന്നിധ്യമാണ് ഡി മരിയ.
2008ൽ പരഗ്വായിക്കെതിരായ ലോകകപ്പ് യോഗ്യതാ മത്സരത്തിലാണ് അർജന്റൈയ്ൻ ജേഴ്സിയിൽ ഡി മരിയ അരങ്ങേറിയത്. 133 മത്സരങ്ങളിൽ നിന്ന് 29ഗോളുകളാണ് താരത്തിന്റെ പേരിലുളളത്. 27 ഗോളുകൾക്ക് വഴിയൊരുക്കാനും ഡി മരിയയ്ക്ക് സാധിച്ചിട്ടുണ്ട്. 2021 ലെ കോപ്പ അമേരിക്ക, 2022 ലെ ‘ഫൈനലസിമ’ പിന്നാലെ നടന്ന ഖത്തർ ലോകകപ്പ് എന്നിവയിൽ ഡി മരിയ അർജന്റീനയ്ക്കായി ഗോൾ നേടിയിട്ടുണ്ട്.
പോർച്ചുഗൽ ക്ലബായ ബെൻഫിക്കയിലാണ് നിലവിൽ ഡി മരിയ കളിക്കുന്നത്. മുമ്പ് റയൽ മാഡ്രിഡ്, മാഞ്ചസ്റ്റർ യുണൈറ്റഡ്, പിഎസ്ജി ക്ലബുകൾക്ക് വേണ്ടിയും ഡി മരിയ കളിച്ചിട്ടുണ്ട്. വാർത്ത പുറത്തുവന്നതിന് പിന്നാലെ കടുത്ത നിരാശയിലാണ് ആരാധകർ.
