മലയാളത്തിന്റെ എക്കാലത്തെയും ഇഷ്ടനടി മഞ്ജു വാര്യർക്ക് ഇന്ന് 45-ാം ജന്മദിനം. 1978 സെപ്റ്റംബർ 10 ന് തമിഴ്‌നാട്ടിലെ നാഗർകോവിലിൽ ഗിരിജ വാര്യരുടെയും മാധവവാര്യരുടെയും മകളായി ജനിച്ച മഞ്ചു ചലച്ചിത്ര ലോകത്തിലെത്തി ചുരുങ്ങിയ കാലയളവിലാണ് കേരളജനതയുടെ മകളായി മാറിയത്. 17-ാം വയസ്സിൽ ‘സാക്ഷ്യം’ എന്ന ചലച്ചിത്രത്തിലൂടെ അഭിനയരംഗത്ത് തന്റെ പ്രതിഭ സാക്ഷ്യപ്പെടുത്തിക്കൊണ്ടായിരുന്നു മഞ്ജു വാര്യർ മലയാള സിനിമയിലേക്കുള്ള കവാടം തുറന്നത്. പിന്നീടങ്ങോട്ട് കൈനിറയെ സിനിമകൾ, എല്ലാം ഒന്നിനൊന്ന് മികച്ചത്.
മലയാളത്തിൽ വ്യക്തിത്വമുള്ള സ്ത്രീ കഥാപാത്രങ്ങൾ ചെയ്ത മഞ്ജു വാര്യർക്ക് ‘ ഈ പുഴയും കടന്ന്’ എന്ന ചിത്രത്തിലൂടെയാണ് മികച്ച നടിക്കുള്ള സംസ്ഥാന ചലച്ചിത്ര അവാർഡ് ആദ്യമായി ലഭിക്കുന്നത്. തുടർന്ന് 1999-ൽ പുറത്തിറങ്ങിയ ‘കണ്ണെഴുതി പൊട്ടും തൊട്ട് ‘ ചിത്രത്തിലെ പ്രകടനത്തിന് ദേശീയ ജൂറിയുടെ പ്രത്യേക പരാമർശവും ലഭിച്ചു.
നീണ്ട ഇടവേളയ്‌ക്കുശേഷം കല്യാൺ ജ്വല്ലറിയുടെ പരസ്യത്തിൽ ഇതിഹാസ നടൻ അമിതാബ് ബച്ചന്റെ കൂടെ അഭിനയിച്ചാണ് മഞ്ചു അഭിനയരംഗത്ത് വീണ്ടും സജീവമാകുന്നത്. തുടർന്ന് 16 വർഷത്തിന് ശേഷം ‘ഹൗ ഓൾഡ് ആർയു’ എന്ന ചിത്രത്തിലൂടെ ചലച്ചിത്ര ലോകത്തിലേക്ക് ഗംഭീര തിരിച്ചു വരവ് നടത്തി. ധനുഷിനൊപ്പം ‘അസുരൻ’ എന്ന ചിത്രത്തിലൂടെ നടി മഞ്ജു വാര്യർ തമിഴ് സിനിമയിൽ അരങ്ങേറ്റം കുറിച്ചു. തുടർന്ന് അജിത്തിന്റെ ‘തുനിവ്’ എന്ന സിനിമയിൽ നായികയായി.
മനു ആനന്ദ് സംവിധാനം ചെയ്യുന്ന ‘മിസ്റ്റർ എക്‌സ്’ എന്ന ത്രില്ലർ ചിത്രമാണ് താരത്തിന്റെ അടുത്ത ചിത്രം. ആര്യയും ഗൗതം കാർത്തിക്കുമാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്. തമിഴ്, തെലുങ്ക്, മലയാളം, കന്നഡ, ഹിന്ദി ഭാഷകളിൽ ചിത്രം 2024-ൽ റിലീസ് ചെയ്യുമെന്നാണ് വിലയിരുത്തൽ.
നവരസങ്ങൾ മിന്നി മായുന്ന ഒരു പിടി നല്ല കഥാപാത്രങ്ങൾ നമുക്ക് സമ്മാനിച്ച മഞ്ചു വാര്യർ ജന്മദിനം കൊണ്ടാടുന്ന വേളയിൽ ” ഹൗ ഓൾഡ് ആർയു” എന്ന ചോദ്യം അപ്രസക്തമാക്കി ” ഇറ്റ് ഡസന്റ് മാറ്റർ” എന്ന മറുപടി തന്ന മലയാളത്തിന്റെ ലേഡി സൂപ്പർസ്റ്റാറിന്റെ അടുത്ത ഗംഭീര വരവിനായി കാത്തിരിക്കുകയാണ് ആരാധകർ.
