കഠിനാധ്വാനവും ആത്മസമർപ്പണവും ആയുധമാക്കി ജീവിതത്തിന്റെ ഉയരങ്ങളിലേക്ക് യാത്ര ചെയ്ത നിരവധി മഹാന്മാരെ കുറിച്ച് നാം കേട്ടിട്ടുണ്ട്. അത്തരത്തിൽ തന്റെ വിദ്യാഭ്യാസവും കഠിനാധ്വാനവും കൊണ്ട് ജീവിതത്തിൽ വിജയം കൊയ്‌തെടുത്ത വ്യക്തിയുടെ കഥയാണ് ഇന്ന് സാമൂഹ്യമാദ്ധ്യമങ്ങളിൽ വൻ തോതിൽ പ്രചരിക്കുന്നത്. നാഗലാൻഡ് മുഖ്യമന്ത്രി നെയ്ഫിയു റിയോയുടെ സ്പെഷ്യൽ ഡ്യൂട്ടി ഓഫീസർ നെല്ലയപ്പന്റെ ട്വിറ്റർ പോസ്റ്റാണ് സാമൂഹ്യമാദ്ധ്യമ ലോകത്ത് വൈറലായിരിക്കുന്നത്.
ഒറ്റമുറി വീട്ടിൽ നിന്ന് താൻ ആഗ്രഹിച്ചത് പോലെ, സ്വപ്‌നം കണ്ടത് പോലെ ഒരു വസതി നിർമ്മിക്കാൻ സാധിച്ചതിന്റെ സന്തോഷമാണ് നെല്ലയപ്പൻ ട്വിറ്ററിലൂടെ പങ്കുവെച്ചിരിക്കുന്നത്. ഓല മേഞ്ഞ വീട്ടിൽ നിന്ന് ഇപ്പോഴത്തെ അദ്ദേഹത്തിന്റെ മനോഹരമായി വീട്ടിലേക്കുള്ള കഠിന യാത്രയെ കുറിച്ചാണ് നെല്ലയപ്പൻ ട്വിറ്ററിൽ പറയുന്നത്. രണ്ട് വീടിന്റെയും ചിത്രങ്ങൾ പങ്കുവെച്ച് കൊണ്ടാണ് പ്രചോദനകരമായ പോസ്റ്റ് അദ്ദേഹം പങ്കുവെച്ചത്. ഇതിനോടകം നിരവധി പേരാണ് അദ്ദേഹത്തെ പ്രശംസിച്ചുകൊണ്ട് രംഗത്തെത്തിയിരിക്കുന്നത്.
’30 വയസ്സ് വരെ നാല് സഹോദരങ്ങൾക്കും മാതാപിതാക്കൾക്കുമൊപ്പം ഞാൻ ഈ ഓല മേഞ്ഞ വീട്ടിലാണ് ജീവിച്ചിരുന്നത്. വിദ്യാഭ്യാസം, സമർപ്പണം, കഠിനാധ്വാനം എന്നിവയിലൂടെ ഇന്ന് കാണുന്ന നിലയിൽ എത്താൻ എനിക്ക് സാധിച്ചു’നെല്ലയപ്പൻ ട്വിറ്ററിൽ കുറിച്ചു. വിദ്യാഭ്യാസവും ആത്മസമർപ്പണവും കഠിനാധ്വാനവും ഉണ്ടെങ്കിൽ എപ്പോഴായാലും വിജയം കൈവരിക്കാമെന്ന് അഭിപ്രായപ്പെട്ട് നിരവധി പേരാണ് അദ്ദേഹത്തെ പ്രശംസിച്ചത്.
