ന്യൂഡൽഹി: പുതിയ പാർലമെന്റ് മന്ദിരം പ്രധാനമന്ത്രിയുടെ ‘നവ ഭാരതം’ എന്ന സ്വപ്നം സാക്ഷാത്കരിക്കുമെന്ന് ബിജെപി എംപി ദീപക് പ്രകാശ്. നവ ഭാരതത്തിന് സാക്ഷ്യം വഹിക്കാനുള്ള ഭാഗ്യം രാജ്യത്തുടനീളമുള്ളവർക്കുണ്ടെന്ന് അദ്ദേഹം പറഞ്ഞു. പുതിയ പാർലമെന്റ് മന്ദിരത്തിലെ സമ്മേളനത്തിന് മുന്നോടിയായി മാദ്ധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.
ഇന്ത്യയിലെ 140 കോടി ഭാരതീയരുടെ അഭിലാഷങ്ങളെ പുതിയ പാർലമെന്റ് മന്ദിരം അടയാളപ്പെടുത്തുമെന്നും പ്രധാനമന്ത്രിയോട് ഞങ്ങൾക്ക് വളരെയധികം നന്ദിയുണ്ടെന്നും അദ്ദേഹം പറഞ്ഞു. പുതിയ പാർലമെന്റ് മന്ദിരത്തിൽ പാർലമെന്റിന്റെ ഇരുസഭകളിലെയും നിയമനിർമ്മാതാക്കൾ സംയുക്ത സമ്മേളനം നടത്തും. കഴിഞ്ഞ 75 വർഷത്തെ പാർലമെന്ററി ജനാധിപത്യത്തെക്കുറിച്ച് അദ്ധ്യക്ഷന്മാരുമായി നടത്തിയ ചർച്ചയ്‌ക്ക് ശേഷം പുതിയ പാർലമെന്റ് മന്ദിരത്തിൽ നടപടികൾ ആരംഭിക്കുമെന്ന് ഇരുസഭകളും കഴിഞ്ഞ ദിവസം അറിയിച്ചിരുന്നു.
പുതിയ പാർലമെന്റ് മന്ദിരത്തിൽ സമ്മേളനത്തിന് മുന്നോടിയായി എംപി പ്രതാപ് ചന്ദ്ര സാരംഗിയും പ്രതികരിച്ചു. ഇതൊരു ചരിത്ര നിമിഷമാണ്. പഴയ പാർലമെന്റ് കെട്ടിടത്തിൽ പ്രധാനമന്ത്രി നരേന്ദ്രമോദിയുടെ പ്രസംഗം പ്രചോദനാത്മകമായിരുന്നു. പണ്ഡിറ്റ് നെഹ്‌റു മുതൽ സർദാർ വല്ലഭായ് പട്ടേൽ വരെ രാജ്യത്തിന്റെ വികസനത്തിനായി നടത്തിയ പ്രവർത്തനങ്ങൾ ഞങ്ങൾ എന്നും ഓർക്കുമെന്നും അദ്ദേഹം കൂട്ടിച്ചേർത്തു
