താലിബാന്റെ രീതികളെ പ്രശംസിച്ച് മലയാളി വ്ളോഗർ. വയനാട് സ്വദേശിയായ മുഹമ്മദ് യാസിൻ എന്ന വ്‌ളോഗറാണ് അഫ്ഗാൻ യാത്രയ്‌ക്കിടെ താലിബാൻ രീതികളെ പ്രശംസിച്ച് വിഡിയോ പോസ്റ്റ് ചെയ്തത്. നിരവധി വീഡിയോകളാണ് ഇയാൾ താലിബാൻ ഭീകരതയെ പുകഴ്‌ത്തിക്കൊണ്ട് യാസിൻ വ്‌ളോഗ്‌സ് എന്ന ചാനലിൽ അപ്ലോഡ് ചെയ്തിരിക്കുന്നത്.
താലിബാന്റെ ആയുധ ശേഖരം പരിചയപ്പെടുത്തുന്നു എന്ന തലക്കെട്ടൊടെ പോസ്റ്റ് ചെയ്ത് വീഡിയോ 1.37 ലക്ഷം പേർ കണ്ടിട്ടുണ്ട്. താൻ താലിബാന്റെ കൂടെ മസാരി ഷെരീഫ് എന്ന സ്ഥലത്താണ് ഉള്ളതെന്ന് യാസിൻ പറയുന്നുണ്ട്. അവിടെ വെച്ചാണ് താലിബാന്റെ ആയുധങ്ങൾ ഓരോന്നായി പരിചയപ്പെടുത്തുന്നത്. താലിബാൻ വളരെ ഫ്രൻഡ്‌ലിയാണെും ഇയാൾ വ്‌ളോഗിൽ പറയുന്നു
അമേരിക്കൻ -റഷ്യൻ- തുർക്കി നിർമ്മിത മിഷിൻ ഗണുകൾ ഇയാൾ പരിചയപ്പെടുത്തുന്നുണ്ട്. എകെ 47, എംകെ 4 തുടങ്ങിയ ഗണുകളും കൈയിലെടുത്ത് കാണിക്കുന്നുണ്ട്. രണ്ട് കൈയിലും മിഷിൻ ഗണെടുത്ത്് താൻ ഇപ്പോൾ താലിബാനായെന്നും എനിക്ക് ഇവരെ പേടിയില്ലെന്നും യാസിൻ പറയുന്നു. ഞാൻ ഇപ്പോൾ കുടുംബത്തിലാണ് ഉള്ളതെന്നും അഫ്ഗാനിൽ വന്നത് കൊണ്ട് മാത്രമാണ് ഇതെല്ലാം നടന്നതെന്നും ഇയാൾ ആവേശത്തൊടെ വ്യക്തമാക്കുന്നു. പത്തിലധികം താലിബാനികളുടെ ഇടയിൽ നിന്നാണ് വീഡിയോ ചിത്രീകരിച്ചിരിക്കുന്നത്. താലിബാനെ അനുകൂലിച്ച് നിരവധി കമന്റുകളാണ് വീഡിയോയ്‌ക്ക് താഴെ വന്നിരിക്കുന്നത്.
രണ്ട് കൊല്ലം മുൻപ് ഒരു നിരീശ്വരവാദി അമേരിക്കൻ ഇവിടെ വന്നെന്നും താലിബാൻകാരുടെ നല്ല സ്വഭാവം കണ്ട് തിരിച്ച് പോയി മുസ്ലീമായെന്നും താലിബാൻകാർ പറഞ്ഞതായി യാസിൻ വീഡിയോയിൽ പറയുന്നു. അഫ്ഗാനിലെ ഗൺ മാർക്കറ്റിൽ നിന്നുള്ള വീഡിയോയും ചാനലിൽ പങ്കുവെച്ചിട്ടുണ്ട്. ഗൺ മാർക്കറ്റ് കൗതുക കാഴ്ചയായാണ് വിഡിയോയിൽ കാണിക്കുന്നത്.
അഫ്ഗാനിൽ നിന്നും ആദ്യം അപ്ലോഡ് ചെയ്ത വീഡിയോയിൽ പേടിച്ചിട്ടാണ് ഇവിടെ വന്നതെന്ന് യാസിൻ പറയുന്നുണ്ട്. താജിക്കാസ്ഥാൻ വഴിയാണ് ഇയാൾ അഫ്ഗാനിലേക്ക് വ്‌ളോഗിംങിന് പോയത്.
