ആംസ്റ്റർഡാം : നെതർലാൻഡിലെ നോർത്ത് ഹോളണ്ടിലുള്ള ഹാർലെമ്മേർമീർ മുനിസിപ്പാലിറ്റിയിലെ മലയാളി അസോസിയേഷൻ ആയ ഹമ്മയുടെ ഓണാഘോഷ ചടങ്ങുകൾ പ്രൗഢഗംഭീരമായി നടന്നു. 200-ൽ അധികം ആളുകളാണ് ഹമ്മയുടെ ഈ പ്രഥമ ഓണാഘോഷത്തിൽ പങ്കെടുത്തത്.
മുൻസിപ്പാലിറ്റിയുടെ മേയർ മറിയാൻ ഷുർമാൻസ് , ഇന്ത്യൻ എംബസിയുടെ ഡെപ്യൂട്ടി ചീഫ് ഓഫ് മിഷൻ മലയാളി കൂടിയായ ജിൻസ് മറ്റം, കൗൺസിലർ പ്രാചി വാൻ ബ്രാണ്ടെൻബർഗ് കുൽക്കർണി, ഹമ്മയുടെ പ്രതിനിധി മണിക്കുട്ടൻ എന്നിവർ ചേർന്ന് ചടങ്ങ് ഉദ്ഘാടനം ചെയ്തു. “മുനിസിപ്പാലിറ്റിയിലെ രണ്ടാമത്തെ ഏറ്റവും വലിയ വിദേശവിഭാഗമായ ഇന്ത്യൻ ജനതയുടെ അവിഭാജ്യ സംസ്ഥാനമായ കേരളത്തിന്റെ സ്വന്തം ഓണാഘോഷത്തിന്റെ ഭാഗമാകാൻ കഴിഞ്ഞതിൽ” മേയർ സന്തോഷം രേഖപ്പെടുത്തി. കൊച്ചു കുട്ടികൾ മുതൽ മുതിർന്നവരെ വരെ ആഘോഷതിൽ ആഴ്ത്തിയ വർണ്ണാഭമായ ഇത്തരം ഒരു ചടങ്ങ് താൻ മനസ്സുകൊണ്ട് ആസ്വദിച്ചു എന്നും അവർ പിന്നീട് ഇൻസ്റ്റാഗ്രാമിൽ കുറിച്ചു. ഇന്ത്യൻ എംബസിയുടെ ഡെപ്യൂട്ടി ചീഫ് ഓഫ് മിഷനും മലയാളിയുമായ ആയ ശ്രീ ജിൻസ് മറ്റം വിദേശ മണ്ണിൽ ഇത്രയും വർണ്ണാഭമായി നടന്ന ഓണാഘോഷത്തിൽ പങ്കെടുത്തതിൽ തന്റെ സന്തോഷം രേഖപ്പെടുത്തുന്നതിനോടൊപ്പം ഹമ്മയുടെ ഭാരവാഹികളെയും അഭിനന്ദിച്ചു. അദ്ദേഹം കുടുംബസമേതമാണ് ചടങ്ങിൽ പങ്കെടുത്തത്.
മാവേലിയുടെ സന്ദർശനം, തിരുവാതിരയും സിനിമാറ്റിക് ഡാൻസും ഉൾപ്പെടെയുള്ള കലാരൂപങ്ങൾ, കുട്ടികളുടെ കലാ സാംസ്കാരിക പ്രകടനങ്ങൾ, വടംവലി, നാരങ്ങ സ്പൂൺ നടത്തം, കസേരകളി സുന്ദരിക്ക് പൊട്ടുകുത്തൽ ഇങ്ങനെ വൈവിധ്യങ്ങളായ ചടങ്ങുകളാൽ ഓണാഘോഷം വർണ്ണാഭമായി.
പായസം ഉൾപ്പെടെ 22ലധികം സ്വാദിഷ്ടമായ വിഭവങ്ങളോടെ വിപുലമായ ഓണസദ്യയും നടന്നു.
