ക്രിയേറ്റർമാർക്ക് പ്രോത്സാഹനവുമായി യൂട്യൂബ്. ജനറേറ്റീവ് ആർട്ടിഫിഷ്യൽ ഇന്റലിജൻസ് ഉപയോഗിച്ചുള്ള ക്രിയേറ്റർ ടൂളുകൾ അവതരിപ്പിക്കാനാണ് യൂട്യൂബ് പദ്ധതിയിടുന്നത്. യൂട്യൂബ് ഷോർട്സിലാകും പുതിയ ടൂളെത്തുക.
‘ഡ്രീം സ്ക്രീൻ’ എന്ന പേരിൽ ഷോർട്ട് വീഡിയോയ്ക്ക് വേണ്ടി പരീക്ഷണാടിസ്ഥാനത്തിൽ ജനറേറ്റീവ് എഐ ടൂളും യൂട്യൂബ് പുറത്തിറക്കി. എഐ ജനറേറ്റഡ് വീഡിയോയും പശ്ചത്താല ചിത്രവും നിർമ്മിക്കാൻ ഡ്രീം ടൂളിന് സാധിക്കും.
പുതിയ വീഡിയോകൾക്കുള്ള ആശയവും ഔട്ട്ലൈനും നൽകുന്ന പുതിയൊരു എഐ ടൂളും യൂട്യൂബ് അവതരിപ്പിച്ചിട്ടുണ്ട്. ക്രിയേറ്റർമാർക്കനുസരിച്ചാണ് ഇതിൽ നിർദേശങ്ങൾ ലഭിക്കുക. എഐ അധിഷ്ടിത മ്യൂസിക് റെക്കമെന്റേഷൻ സംവിധാനം ഒരുക്കാനും കമ്പനിക്ക് പദ്ധതിയുണ്ട്. ഇതുവഴി വീഡിയോകൾക്ക് അനുയോജ്യമായ മ്യൂസികും നിർദേശിക്കും.
വിദേശ ഭാഷകളിൽ ഡബ്ബ് ചെയ്യാൻ സാധിക്കുന്ന എഐ ടൂളും കമ്പനി ഒരുക്കുന്നുണ്ട്. ഷോർട്സ് ക്രിയേറ്റർമാർക്ക് വേണ്ടിയുള്ള യൂട്യൂബ് ക്രിയേറ്റ് എന്ന പുതിയ ആപ്പും അവതരിപ്പിച്ചു. ന്യൂയോർക്കിൽ നടന്ന ചടങ്ങിൽ സംസാരിക്കവേയാണ് യൂട്യൂബ് സിഇഒ നീൽ മോഹൻ പുത്തൻ ടൂളുകളെ കുറിച്ച് പറഞ്ഞത്.
