പ്രിയദര്ശൻ, മോഹന്ലാല്, എം.ജി. ശ്രീകുമാര് എന്നിവരുടേത്മലയാള സിനിമയിലെ ഏറ്റവും മികച്ച കൂട്ടുകെട്ടുകളിൽ ഒന്നാണ്. ഇവരൊരുമിച്ചുള്ള ഒരു ചിത്രത്തിനായി കാത്തിരിക്കുകയാണ് പ്രേക്ഷകർ. മലയാള സിനിമക്ക് വലിയ ഹിറ്റുകള് സമ്മാനിച്ച കൂട്ടുകെട്ടില് നിന്ന് പുതിയ ചിത്രം പ്രഖ്യാപിച്ചിരിക്കുകയാണ് ഇപ്പൊൾ. പ്രിയദര്ശന്റെ സംവിധാനത്തില് മോഹന്ലാല് നായകനായെത്തുന്ന പുതിയ ചിത്രത്തെ കുറിച്ച് ഫേസ്ബുക്കില് പങ്കുവെച്ച പോസ്റ്റില് അറിയിച്ചിരിക്കുന്നത് ഗായകൻ എം.ജി. ശ്രീകുമാര് ആണ്.
അടുത്ത വർഷം റിലീസിനെത്തുന്ന ചിത്രത്തിന് ഹരം എന്നാണ് പേരിട്ടിരിക്കുന്നത്. മൂവരും ഒന്നിച്ചുള്ള ഒരു കാരിക്കേച്ചർ പങ്കുവെച്ചുകൊണ്ടാണ് പുതിയ ചിത്രത്തെ കുറിച്ച് എം.ജി. ശ്രീകുമാര് വെളിപ്പെടുത്തിയത്. എന്നാൽ സിനിമയെ കുറിച്ചുളള മറ്റു വിവരങ്ങൾ പങ്കുവെച്ചിട്ടില്ല. പ്രിയദര്ശന്റെ നൂറാമത്തെ സംവിധാന സംരഭംമായിട്ടാകും സിനിമ എത്തുക. പുതിയ സിനിമക്ക് ആശംസകളുമായി ആരാധകർ രംഗത്തെത്തിയിട്ടുണ്ട്.
2021ല് റിലീസ് ചെയ്ത “മരക്കാര് അറബിക്കടിലിന്റെ സിംഹം” ആണ് ഇരുവരും ഒടുവില് ഒന്നിച്ച ചിത്രം. സാമ്പത്തികമായി വിജയം നേടിയ സിനിമയ്ക്ക് ശേഷം ഇരുവരും ഹരത്തിലൂടെ വീണ്ടും ഒന്നിക്കുകയാണ്. ജീത്തു ജോസഫിന്റെ ‘നേര്’ എന്ന ചിത്രത്തിലാണ് മോഹൻലാൽ ഇപ്പോൾ അഭിനയിക്കുന്നത്. ജയിലറാണ് ഒടുവില് തിയേറ്ററുകളിലെത്തിയ മോഹന്ലാലിന്റെ ചിത്രം. മോഹന്ലാലിന്റേതായി പാന് ഇന്ത്യന് ആക്ഷന് ചിത്രം വൃഷഭ’യുടെ ചിത്രീകരണവും പുരോഗമിക്കുന്നുണ്ട്. നന്ദ കിഷോറാണ് വൃഷഭയുടെ സംവിധാനം. മലൈക്കോട്ടൈ വാലിബൻ ജനുവരി 25 ന് തിയറ്ററുകളിലെത്തും.
