ബെംഗളുരു: കാവേരി നദീ ജലം തമിഴ്നാടിന് വിട്ടുകൊടുക്കുന്നതിനെതിരെ ബെംഗളൂരുവിൽ ബന്ദ് നടക്കുകയാാണ്. ഇതിനിടയിൽ തമിഴ്നാട്ടിലും കർഷകർ പ്രതിഷേധം ശക്തമാക്കിയിട്ടുണ്ട്. തമിഴ്നാട്ടിലെ തിരുച്ചറപ്പള്ളിയില് ചത്ത എലിയെ കടിച്ചുപിടിച്ചുകൊണ്ടാണ് ഒരുകൂട്ടം കര്ഷകര് വ്യത്യസ്തമായ പ്രതിഷേധ സമരം നടത്തിയത്. ബന്ദിനെതിരെ നടപടിയെടുക്കാതെ മൗനം പാലിക്കുന്ന കര്ണാടക സര്ക്കാരിന്റെ നിലപാടിനെതിരെയും കര്ണാടകയില്നിന്ന് തമിഴ്നാട്ടിലേക്ക് കാവേരി നദീ ജലം നല്കണമെന്നും ആവശ്യപ്പെട്ടാണ് കര്ഷകര് എലിയെ കടിച്ചുപിടിച്ചുകൊണ്ട് പ്രതിഷേധിച്ചിരിക്കുന്നത്.
തമിഴ്നാട്ടിലെ മറ്റ് പല ഭാഗങ്ങളിലും പ്രതിഷേധം നടന്നിരുന്നു. തഞ്ചാവൂരിലെ കര്ഷകര് തഞ്ചാവൂര് ജില്ല കലക്ടറുടെ ഓഫീസിന് മുന്നില് ബലിതര്പ്പണം നടത്തിയാണ് പ്രതിഷേധിച്ചത്. കൃഷിയിറക്കുന്നതിനായി കാവേരി വെള്ളം ആവശ്യമാണ്. ഇതിനായി തമിഴ്നാട് സര്ക്കാര് നടപടി സ്വീകരിക്കണമെന്നാണ് കർഷകരുടെ ആവശ്യം.
ദക്ഷിണേന്ത്യൻ സംസ്ഥാനങ്ങൾ തമ്മിലുള്ള കാവേരി നദീജല തർക്കം പതിറ്റാണ്ടുകളായി തുടരുന്നതാണ്. തമിഴ്നാടിനു 15 ദിവസത്തേക്കു 5000 ക്യുസെക് വീതം അധിക ജലം വിട്ടു നൽകണമെന്ന കാവേരി ജല മാനേജ്മെന്റ് അതോറിറ്റിയുടെ ഉത്തരവിൽ പ്രതിഷേധിച്ചാണ് ഇന്ന് ബന്ദ് നടക്കുന്നത്. ഉത്തരവിൽ ഇടപെടാൻ കഴിയില്ലെന്നു സുപ്രീംകോടതിയും വ്യക്തമാക്കിയിരുന്നു.