കോഴിക്കോട്: സിപിഎം പ്രകടനത്തെ വിമർശിച്ച വഴിയാത്രക്കാരനെ കയ്യേറ്റം ചെയ്തു. കോഴിക്കോട് വടകരയിലാണ് സംഭവം. മർദ്ദനമേറ്റ യുവാവിന്റെ പേര് വിവരങ്ങൾ പുറത്തുവിടാൻ പൊലീസ് തയ്യാറായിട്ടില്ല.
വടകരയിലെ തെരഞ്ഞെടുപ്പുമായി ബന്ധപ്പെട്ട സിപിഎം നടത്തുന്ന പൊതുയോഗത്തിന്റെ ഭാഗമായുള്ള പ്രകടനത്തെ വിമർശിച്ച് യുവാവ് ഫേസ്ബുക്ക് ലൈവ് ഇടാൻ ശ്രമിച്ചിരുന്നു. പ്രകടനം മാർഗതടസം സൃഷ്ടിക്കുന്നുവെന്നായിരുന്നു യുവാവിന്റെ ആരോപണം. ഇതിനിടെയാണ് ഒരു സംഘം പ്രവർത്തകർ യുവാവിനെ കയ്യേറ്റം ചെയ്തത്.
പോലീസ് നോക്കി നിൽക്കെയാണ് പ്രവർത്തകർ ഇയാളെ മർദ്ദിച്ചത്. തുടർന്ന് പൊലീസ് ഇടപെട്ടാണ് യുവാവിനെ ചികിത്സ നൽകി സ്റ്റേഷനിൽ എത്തിച്ചത്. പരാതി നൽകാൻ താൽപര്യമില്ലെന്ന് യുവാവ് അറിയിച്ചുവെന്നാണ് വടകര പൊലീസ് നൽകുന്ന വിശദീകരണം. തുടർന്ന് ഇയാൾ വീട്ടിലേക്ക് മടങ്ങിയെന്നുമാണ് പൊലീസ് പറയുന്നത്.