തിരുവനന്തപുരം: ഭാരതത്തിന്റെ ഹരിതവിപ്ലവത്തിന്റെ ശിൽപ്പിയായ എംഎസ് സ്വാമിനാഥന്റെ നിര്യാണത്തിൽ ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ അനുശോചിച്ചു. കാർഷിക സ്വയംപര്യാപ്തതയിലേക്ക് ഭാരതത്തെ നയിച്ച മഹാവ്യക്തിത്വമായിരുന്നു അദ്ദേഹം. രാജ്യം പത്മശ്രീയും പത്മഭൂഷണും പത്മവിഭൂഷണും നൽകി ആദരിച്ച സ്വാമിനാഥന് ജനങ്ങളുടെ മനസിലും വലിയ സ്ഥാനമാണുള്ളതെന്ന് കെ സുരേന്ദ്രൻ പറഞ്ഞു.
ഭാരതത്തിന്റെ മാത്രമല്ല ലോകത്തിന്റെ തന്നെ പട്ടിണി മാറ്റാൻ ജീവിതം ഉഴിഞ്ഞുവെച്ച അദ്ദേഹത്തിന്റെ വിയോഗം എല്ലാവർക്കും തീരാ നഷ്ടമാണ്. കുട്ടനാടിന്റെ പ്രത്യേകതകൾ മനസിലാക്കിയ സ്വാമിനാഥൻ കേരളത്തിന് നൽകിയ സംഭാവനകൾ വളരെ വലുതായിരുന്നെന്നും കെ.സുരേന്ദ്രൻ പറഞ്ഞു. എംഎസ് സ്വാമിനാഥന്റെ നിര്യാണത്തിൽ അദ്ദേഹത്തിന്റെ കുടുംബത്തിന്റെ ദുഖത്തിൽ പങ്കുചേരുന്നു എന്നും കെ സുരേന്ദ്രൻ കൂട്ടിച്ചേർത്തു.
ഇന്ത്യൻ ഹരിത വിപ്ലവത്തിന്റെ പിതാവ് എന്നാണ് എംഎസ് സ്വാമിനാഥനെ അറിയപ്പെട്ടിരുന്നത്. ഇന്ന് രാവിലെ ചെന്നൈയിലായിരുന്നു അദ്ദേഹത്തിന്റെ അന്ത്യം.