ബാങ്കോക്ക്: വിശ്വഹിന്ദു പരിഷത്തിന്റെ നേതൃത്വത്തിൽ തായ്ലൻഡിൽ ഗണേശോത്സവം വർണാഭമായി ആഘോഷിച്ചു. ബാങ്കോക്കിലെ നിംബുത്തർ സ്റ്റേഡിയത്തിൽ സംഘടിപ്പിച്ച സാർവജനിക ഗണേശോത്സവത്തിൽ ആയിരക്കണക്കിന് ജനങ്ങളാണ് പങ്കെടുത്തത്. മഹാഗണപതിക്ക് പൂക്കളും മധുരപലഹാരങ്ങളും സുഗന്ധദ്രവ്യങ്ങളും അർപ്പിച്ച് ഭക്തർ മഹാഗണപതിയെ വണങ്ങി പ്രാർത്ഥിച്ചു.
സർക്കാർ മന്ത്രാലയങ്ങളിലെയും എംബസിയിലെയും ഉദ്യോഗസ്ഥർ, വിവിധ അസോസിയേഷനുകളുടെ ഭാരവാഹികൾ, പ്രമുഖ വ്യക്തികൾ തുടങ്ങിയവർ ഗണേശോത്സവത്തിൽ പങ്കെടുത്തു. ഭാരതത്തിലെയും തായ്‌ലൻഡിലെയും പരമ്പരാഗത നൃത്തങ്ങളും സംഗീതവും ഗണേശോത്സവത്തിന് മാറ്റുകൂട്ടി.
ചിത്രകലാമത്സരം, പരസ്ഥിതി സൗഹൃദ പാചകമേള, വൈവിധ്യമാർന്ന കരകൗശല വസ്തുക്കൾ, വസ്ത്രങ്ങൾ, സുവനീറുകൾ എന്നിവയുടെ വിപണനമേളയും ഇതോടൊപ്പം നടന്നു. നിറങ്ങൾ വാരിയെറിഞ്ഞ് തായ് നൃത്തത്തിന്റെ അകമ്പടിയോടെ നടന്ന വർണാഭമായ ഘോഷയാത്രയോടെയാണ് ഗണേശവിഗ്രഹം നിമജ്ജനം ചെയ്തത്.
