നിരവധി പ്രകൃതി ദുരന്തങ്ങൾക്കാണ് ഇന്നു നാം സാക്ഷ്യം വഹിക്കുന്നത്. മാറി വരുന്ന കാലാവസ്ഥ വ്യതിയാനങ്ങൾ മനുഷ്യന്റെ ജീവിതം തകിടം മറിച്ചു കൊണ്ടിരിക്കുകയാണ്. ഇപ്പോൾ നാം നേരിടുന്ന മറ്റൊരു പ്രകൃതി ദുരന്തമാണ് ന്യൂനമർദ്ദങ്ങളും ചുഴലിക്കാറ്റും. അറബിക്കടലിന്റെ മുകളിൽ രൂപപ്പെടുന്ന അതിശക്തമായ ചുഴലിക്കാറ്റിനു പിന്നിലെ കാരണം കണ്ടെത്തിയിരിക്കുകയാണ് ശാസ്ത്രലോകം. നേച്ചർ സയന്റിഫിക് റിപ്പോർട്സ് മാഗസിനിൽ പ്രസിദ്ധീകരിച്ച പ്രബന്ധത്തിലാണ് ഇതേ കുറിച്ച് പരാമർശിച്ചിരിക്കുന്നത്.
സമുദ്രാന്തരീക്ഷ താപനിലയിൽ വരുന്ന മാറ്റങ്ങളാണ് അറബിക്കടലിൽ രൂപപ്പെടുന്ന ചുഴലുക്കാറ്റിനു പിന്നിലെന്നാണ് ഗവേഷകർ കണ്ടെത്തിയിരിക്കുന്നത്. താപനില, മർദ്ദം എന്നിവയുണ്ടാക്കുന്ന തെർമോഡൈനാമിക് ഘടന കിഴക്കൻ അറബിക്കടലിൽ സൈക്ലോജനിസിസ് എന്ന പ്രതിഭാസത്തിനു കാരണമാകുന്നു. മൺസൂണിനു ശേഷമുള്ള കാലഘട്ടത്തിൽ ചുഴലിക്കാറ്റുകളുടെ ദൈർഘ്യം മൂന്നിരട്ടിയായി വർദ്ധിച്ചതായി പഠനങ്ങളിൽ പറയുന്നു. കുസാറ്റിലെ അഡ്വാൻസ്ഡ് സെന്റർ ഫോർ അറ്റ്മോസ്ഫെറിക് റഡാർ റിസർച്ചിലെ (എസിഎആർആർ) ഗവേഷകനായ സി.എസ്. അഭിറാം നിർമ്മലിന്റെ ഗവേഷണ പ്രബന്ധത്തിലാണ് ചുഴലിക്കാറ്റ് രൂപപ്പെടാനുള്ള കാരണങ്ങൾ വിശദീകരിക്കുന്നത്.