കാത്തിരിപ്പുകൾക്ക് വിരാമം കുറിച്ച് ഉണ്ണി മുകുന്ദൻ ചിത്രത്തിന്റെ ടൈറ്റിൽ പുറത്ത്. ഫേസ്ബുക്ക് പോസ്റ്റിലൂടെ ഉണ്ണി മുകുന്ദൻ തന്നെയാണ് ടൈറ്റിൽ പ്രഖ്യാപനം നടത്തിയത്. നിങ്ങൾ അവന്റെ വില്ലനിസം കണ്ടു! ഇനി അവന്റെ വീരഗാഥകൾക്ക് സാക്ഷിയാകൂ ഹലോ, മാർക്കോ! എന്നാണ് താരം ഫേസ്ബുക്കിൽ കുറിച്ചിരിക്കുന്നത്. ചിത്രത്തിന്റെ ഫസ്റ്റ് ലുക്ക് മോഷൻ പോസ്റ്ററും പുറത്തിറക്കിയിട്ടുണ്ട്. ഇന്ന് ഗാന്ധി ജയന്തിദിനത്തിൽ രാവിലെ 10.10-നാണ് അപ്ഡേറ്റുമായി താരം എത്തിയത്.
ഉണ്ണി മുകുന്ദനെ നായകനാക്കി ഹനീഫ് അദേനി ഒരുക്കുന്ന ഈ ആക്ഷൻ എന്റർടെയ്നർ ചിത്രത്തിന്റെ പേര് ‘മാർക്കോ’ എന്നാണ്. മിഖായേൽ എന്ന നിവിൻ പോളി ചിത്രത്തിൽ ഉണ്ണി മുകുന്ദൻ അവതരിപ്പിച്ച മാർക്കോ ജൂനിയർ എന്ന കഥാപാത്രത്തെ ആസ്പദമാക്കി ഒരുക്കുന്ന സിനിമയാണിത്.
ഉണ്ണിയുടെ കരിയറിലെ തന്നെ ഏറ്റവും വ്യത്യസ്തമായ സ്റ്റൈലിഷ് വില്ലൻ വേഷങ്ങളിലൊന്നായിരുന്നു മിഖായേലിലെ ‘മാർക്കോ’ എന്ന കഥാപാത്രം. ചിത്രത്തിലെ താരത്തിന്റെ അസാധ്യ പ്രകടനവും ലുക്കും ഏറെ പ്രേക്ഷക പ്രശംസയും ശ്രദ്ധയും നേടിയിരുന്നു. മിഖായേലിലെ മാർക്കോയുടെ തീം മ്യൂസിക് ഉൾപ്പെടുത്തിയാണ് മോഷൻ പോസ്റ്റർ ഒരുക്കിയിരിക്കുന്നത്.
ഉണ്ണി മുകുന്ദന് പുറമെ ചിത്രത്തിന്റെ അണിയറപ്രവർത്തകരും സിനിമയുടെ ഫസ്റ്റ്ലുക്ക് മോഷൻ പോസ്റ്റർ റിലീസ് ചെയ്തിട്ടുണ്ട്. മലയാളത്തിൽ നിന്നുള്ള ഏറ്റവും മികച്ച ആക്ഷൻ ത്രില്ലർ സിനിമകളിലൊന്നാകും മാർക്കോ എന്നാണ് റിപ്പോർട്ടുകൾ സൂചിപ്പിക്കുന്നത്. 30 കോടി ബജറ്റിൽ ഒരുങ്ങുന്ന ചിത്രത്തിന്റെ പ്രൊഡക്ഷൻ ക്യൂബ്സ് എന്റർടെയ്ൻമെന്റ്സ് ആണ്.