ന്യൂഡല്ഹി: ഡല്ഹി-മുംബൈ എക്സ്പ്രസ് വേയുടെ രണ്ടാമത്തെ ഘട്ടമായ ഡല്ഹി-വഡോദര പാത പ്രധാമന്ത്രി ഇന്ന് ഉദ്ഘാടനം ചെയ്യും. 10 മണിക്കൂറില് ഡല്ഹിയില് നിന്നും വഡോദരയില് എത്താന് സഹായിക്കുന്നതാണ് പുതിയ പാത.
1,000 കിലോമീറ്ററില് കൂടുതലാണ് ഡല്ഹിയില് നിന്നും വഡോദരയിലേക്കുള്ള ദൂരം. 18 മുതല് 20 മണിക്കൂര് വരെ സമയം യാത്രയ്ക്ക് ദൈര്ഘ്യമെടുക്കും. എന്നാല് എക്സ്പ്രസ് വേയുടെ രണ്ടാം ഘട്ടം യാഥാര്ത്ഥ്യമാകുന്നതോടെ ദൂരം 845 കിലോമീറ്ററായി കുറയും. ഇതോടെ ഡല്ഹിയില് നിന്നും വഡോദരയിലേക്കുള്ള യാത്രാസമയം 10 മണിക്കൂറായി ചുരുങ്ങുന്നതാണ്. സോഹ്ന, ദൗസ, ലാല്സോട്ട് സവായ് മധോപ്പൂര്, കോട്ടല, രത്ലം ദഹോദ്, ഗോദ്ര എന്നീ സ്ഥലങ്ങള് വഴിയാണ് എക്സ്പ്രസ് വേ കടന്നുപോകുന്നത്. രാജസ്ഥാന് (373 കി.മീ), മധ്യപ്രദേശ് (244 കി.മീ), ഹരിയാന (79 കി.മീ) എന്നീ സംസ്ഥാനങ്ങളിലൂടെ അതിവേഗ പാത കടന്നുപോകും.
2019 മാര്ച്ചില് ആരംഭിച്ച 1,386 കിലോമീറ്റര് ഡല്ഹി-മുംബൈ അതിവേഗ പാതയുടെ ആദ്യഘട്ടമായ ഡല്ഹി-ജയ്പൂര് പാത 2023 ഫെബ്രുവരിയില് പൊതുജനങ്ങള്ക്കായി തുറന്ന് കൊടുത്തിരുന്നു. ഇത് ഡല്ഹിയില് നിന്നും ജയ്പൂരിലേക്കുള്ള ദൂരം രണ്ട് മണിക്കൂറായി കുറച്ചു. 2024 ഡിസംബര് ആകുമ്പോഴേക്കും എക്സ്പ്രസ് വേയുടെ നിര്മ്മാണം പൂര്ത്തിയാകുമെന്നാണ് കരുതുന്നത്. ഡല്ഹി, ഹരിയാന, രാജസ്ഥാന്, മദ്ധ്യപ്രദേശ്, ഗുജറാത്ത്, മഹാരാഷ്ട്ര എന്നീ ആറ് സംസ്ഥാനങ്ങളെ ബന്ധിപ്പിക്കുന്നതാണ് ഡല്ഹി-മുംബൈ എക്സ്പ്രസ് വേ. 12 മണിക്കൂറിനുള്ളില് ഡല്ഹിയില് നിന്ന് മുംബൈയിലെത്താന് ഇതോടെ യാത്രക്കാര്ക്ക് സാധിക്കും.