ബാങ്ക് തട്ടിപ്പുകളെക്കുറിച്ചുള്ള ചർച്ചകൾക്കാണ് കഴിഞ്ഞ ഏതാനും നാളുകളായി കേരളജനത സാക്ഷ്യം വഹിക്കുന്നത്. ഈ സാഹചര്യത്തിൽ സഹകരണ ബാങ്കുകളിലെ ക്രമക്കേടുകൾ അനുസ്മരിപ്പിച്ചുകൊണ്ടാണ് പുതിയ ചിത്രത്തിന്റെ ടീസർ പുറത്തിറങ്ങിയിരിക്കുന്നത്. ‘പൊറാട്ട് നാടക’മെന്ന സിനിമയുടെതാണ് ടീസർ. സ്വഭാവഗുണമില്ലെങ്കിൽ സഹകരണമില്ല’ എന്ന ഗാന്ധിജിയുടെ വാചകത്തോടെയാണ് ഗാന്ധി ജയന്തി ദിനത്തിൽ തന്നെ ടീസർ പുറത്തിറക്കിയിരിക്കുന്നത്.
സൈജുക്കുറിപ്പിനെ നായകനാക്കി നൗഷാദ് സാഫ്റോൺ സംവിധാനം ചെയ്യുന്ന ചിത്രമാണ് ‘ പൊറാട്ട് നാടകം’. അന്തരിച്ച പ്രശസ്ത സംവിധായകൻ സിദ്ദിഖിനോടൊപ്പം സഹ സംവിധായകനായി പ്രവർത്തിച്ചിരുന്ന നൗഷാദിന്റെ ആദ്യ ചിത്രം കൂടിയാണിത്. എമിറേറ്റ്സ് പ്രൊഡക്ഷന്റെയും മീഡിയ യൂണിവേഴ്സിന്റെയും ബാനറിൽ വിജയൻ പള്ളിക്കരയാണ് ചിത്രത്തിന്റെ നിർമ്മാതാവ്. മോഹൻലാൽ, ഈശോ തുടങ്ങിയ ചിത്രങ്ങൾക്ക് ശേഷം സുനീഷ് വാരനാട് തിക്കഥ നിർവ്വഹിച്ചിരിക്കുന്ന ഈ ചിത്രം കാഞ്ഞങ്ങാട്, നീലേശ്വരം ഭാഗങ്ങളിലാണ് ചിത്രീകരിച്ചിരിക്കുന്നത്.
വടക്കൻ കേരളത്തിലെ ഗോപാലപുരം എന്ന ഗ്രാമത്തിലെ ലൈറ്റ്സ് ആൻഡ് സൗണ്ട് കടയുടമയായാണ് ഷൈജു ചിത്രത്തിൽ എത്തുന്നത്. സൈജുവിനു പുറമെ ധർമ്മജൻ ബോൾഗാട്ടി, രമേഷ് പിഷാരടി, ഷുക്കൂർ വക്കീൽ,ഐശ്വര്യ മിഥുൻ തുടങ്ങി ഒട്ടേറെ താരങ്ങളും പ്രധാന വേഷങ്ങളിൽ ചിത്രത്തിൽ എത്തുന്നുണ്ട്. സമകാലിക വിഷയങ്ങളെ ആക്ഷേപ ഹാസ്യത്തിലൂടെ ചിത്രീകരിച്ചിരിക്കുന്ന ഈ ചിത്രം നവംബറിൽ തിയേറ്ററുകളിലെത്തുമെന്നാണ് പുറത്തു വരുന്ന റിപ്പോർട്ടുകൾ.
