ജിമെയിലിൽ നിന്നും ഒരു ഫീച്ചർ കൂടി പിൻവലിച്ച് ഗൂഗിൾ. പത്ത് വർഷത്തിലേറെയായി ഉണ്ടായിരുന്ന ഫീച്ചറാണ് ഗൂഗിൾ അവസാനിപ്പിച്ചത്. മുമ്പ് ഏറെ സജീവമായിരുന്ന ബേസിക് എച്ച്ടിഎംഎൽ വ്യൂ സൗകര്യമാണ് പിൻവലിച്ചിരിക്കുന്നതെന്ന് കമ്പനി ഔദ്യോഗികമായി അറിയിച്ചു. 2024 ജനുവരി ആദ്യം മുതലാകും ഈ ഫീച്ചർ ലഭ്യമല്ലാതാകുക.
മെയിൽ പരിശോധിക്കുന്നതിനും മറുപടി അയക്കുന്നതിനും പുതിയ മെയിലുകൾ ക്രിയേറ്റ് ചെയ്യുന്നതിനും സഹായിച്ച സൗകര്യമാണ് ബേസിക് എച്ച്ടിഎംഎൽ വ്യൂ. ഇന്റർനെറ്റ് ശരിയായ രീതിയിൽ ലഭ്യമല്ലാത്തപ്പോൾ പോലും ഈ സേവനം ഫലപ്രദമായിരുന്നു. പുതിയ മാറ്റം ജിമെയിലിന്റെ സപ്പോർട്ട് പേജിൽ ഗൂഗിൾ അറിയിപ്പ് നൽകിയിട്ടുണ്ട്.
2024 ജനുവരി മുതൽ ജിമെയിൽ തുറക്കുമ്പോൾ നിലവിലുള്ള സ്റ്റാൻഡേർഡ് വ്യൂവിലേക്കാകും ഓട്ടോമാറ്റിക്കായി മാറുക. ഉപയോക്താക്കൾക്ക് ഇ-മെയിൽ മുഖേനയും അറിയിപ്പ് ലഭിക്കുന്നുണ്ട്. ഡെസ്ക്ടോപ്പിലും മൊബൈലിലും പുതിയ മാറ്റം ബാധകമായിരിക്കും.
