പാലക്കാട്: ഓപ്പറേഷൻ മൂൺലൈറ്റിന്റെ ഭാഗമായി നടത്തിയ മിന്നൽ പരിശോധനയിൽ മദ്യ സ്റ്റോക്കിൽ നിന്ന് 37 ലിറ്റർ ജവാൻ മദ്യം കുറവുള്ളതായി കണ്ടെത്തി. ഷോപ്പ് മാനേജരിൽ നിന്ന് കണക്കിൽപ്പെടാത്ത 22,000 രൂപ പിടികൂടി. മദ്യം വിൽപന നടത്തിയ കണക്കിൽ 16,000 രൂപ കൂടുതൽ കണ്ടെത്തി. പാലക്കാട് ജില്ലയിലെ മണ്ണാർക്കാട് കാഞ്ഞിരം ബവ്കോ ഔട്ട്ലെറ്റിലാണ് സംഭവം.
ജില്ലയിൽ ഒലവക്കോട് താണാവ്, കുളപ്പുള്ളി, ആലത്തൂർ ഔട്ലെറ്റുകളിലും നടത്തിയ പരിശോധനകളിലും വ്യാപക ക്രമക്കേട് കണ്ടെത്തി. ഒലവക്കോട് താണാവ് ഔട്ലെറ്റിൽ മദ്യം വിറ്റ കണക്കിൽ 5400 രൂപയുടെ കുറവും ഷൊർണൂർ കുളപ്പുള്ളി ഔട്ലെറ്റിൽ 2450 രൂപയുടെ കുറവും കണ്ടെത്തി. ആലത്തൂർ ഔട്ലെറ്റിൽ നടത്തിയ പരിശോധനയിൽ മദ്യം വിറ്റ കണക്കിൽ 2500 രൂപ കൂടുതലാണ്.
പലയിടത്തും സ്റ്റോക്കിലും കണക്കുകളിലും ക്രമക്കേടുണ്ടെന്ന് വിജിലൻസ് വ്യക്തമാക്കുന്നു. ഒരിടത്തും സ്റ്റോക്ക് വിവരങ്ങൾ പ്രദർശിപ്പിച്ചിരുന്നില്ല. മദ്യം പേപ്പറിൽ പൊതിഞ്ഞു നൽകണമെന്ന മാനദണ്ഡവും പലയിടത്തും പാലിക്കപ്പെട്ടിട്ടുമില്ല. വ്യാപകമായി പരിശോധന പുരോഗമിക്കുകയാണ്.
