വന്ദേഭാരത് ട്രെയിനുകളുടെ വരാനിരിക്കുന്ന പുതിയ സ്ലീപ്പർ ട്രെയിനുകളെ പ്രശംസിച്ച് ആനന്ദ് മഹീന്ദ്ര. രാജ്യത്തിന്റെ ജനസംഖ്യയിലെ ഭൂരിഭാഗം ജനങ്ങളുടെയും ജീവിതനിലവാരം ഉയർത്തുന്നതാണ് ലക്ഷ്യമെങ്കിൽ ഇന്ത്യ അതിവേഗം വളരുമെന്നായിരുന്നു അദ്ദേഹത്തിന്റെ വാക്കുകൾ. എക്സിൽ പങ്കുവെച്ച പോസ്റ്റിലാണ് അദ്ദേഹം ഇത് പറഞ്ഞത്. വിശാലവും സൗകര്യപ്രദവുമായ ബർത്തുകളും തെളിച്ചമുള്ള ഇന്റീരിയറും രൂപകൽപ്പനയും സാങ്കേതികവിദ്യയും ഒരുങ്ങുന്ന വന്ദേഭാരത് സ്ലീപ്പറിന്റെ ചിത്രങ്ങൾ ആകർഷണീയമാണ്.
ഇന്നലെയാണ് കേന്ദ്ര റെയിൽവേ വകുപ്പ് മന്ത്രി അശ്വിനി വൈഷ്ണവ് ചിത്രങ്ങൾ പങ്കുവെച്ചത്. സാങ്കല്പിക ചിത്രങ്ങൾ പങ്കുവെച്ചതിന് പിന്നാലെ നിരവധിപേരാണ് ആശംസകൾ അറിയിച്ച് രംഗത്ത് വന്നത്. പുതിയ വന്ദേഭാരത് ട്രെയിനുകൾ 2024 ആദ്യം എത്തുമെന്നാണ് അശ്വിനി വൈഷ്ണവ് പങ്കുവെച്ച് പോസ്റ്റിൽ പറഞ്ഞത്. വന്ദേ ഭാരത് എക്സ്പ്രസ് സ്ലീപ്പർ പതിപ്പിന്റെ രൂപകല്പനയും ഇന്റീരിയറും ഏകദേശം പൂർത്തിയായതായി റെയിൽവേ ഉദ്യോഗസ്ഥർ പറഞ്ഞിരുന്നു.
പുതിയ സ്ലീപ്പർ ട്രെയിനുകൾ മണിക്കൂറിൽ 160 കിലോമീറ്റർ വേഗതയിൽ ഓടുന്നവയാണ്. 823 യാത്രക്കാർക്ക് വേണ്ടി 857 ബെർത്തുകളാണ് സജ്ജീകരിച്ചിരിക്കുന്നത്. 34 ജീവനക്കാരും ട്രെയിനിലുണ്ടാകും. ഓരോ കോച്ചിനും മിനി പാൻട്രി സൗകര്യവും ഉണ്ടായിരിക്കും. ഓൺ ബോർഡ് ഇൻഫോടെയ്ൻമെന്റ്, പബ്ലിക് അനൗൺസ്മെന്റ്, യാത്രക്കാർക്ക് ലോക്കോ പൈലറ്റുമായി സംസാരിക്കാനുള്ള സൗകര്യം എന്നിവയും ഉണ്ടായിരിക്കും. നിലവിൽ വന്ദേഭാരത് ട്രെയിനുകൾക്ക് വൻ സ്വീകാര്യതയാണ് ലഭിക്കുന്നത്. ഇതിന് പിന്നാലെ പുതിയവ കൂടി എത്തുന്ന എന്നത് വലിയ പ്രതീക്ഷയോടെയാണ് ഏവരും നോക്കിക്കാണുന്നത്.
