മോഹൻലാൽ ചിത്രം എമ്പുരാന്റെ ഷൂട്ടിംഗ് ഇന്ന് ആരംഭിക്കും. ചിത്രത്തിന്റെ ആദ്യ ഷെഡ്യൂള് ഷൂട്ടിങ് ഡൽഹിയിലാണ് തുടങ്ങുന്നത്. ഇതിന്റെ ഭാഗമായി പൃഥിരാജ് ഇന്ന് രാവിലെ ഡൽഹിയിൽ എത്തി. ഒരു ദിവസത്തെ ഷൂട്ടിംഗ് മാത്രമാണ് ഡൽഹിയിലുള്ളത്. ബാക്കി ഷൂട്ടിംഗ് ലഡാക്കിലാണ്. മോഹൻലാൽ ഒരു ദിവസത്തെ ഷൂട്ടിംഗിന് ശേഷം കേരളത്തിലേക്ക് മടങ്ങും.
ലഡാക്ക് ഷെഡ്യൂള് ആരംഭിച്ച് ഏതാനും ദിവസങ്ങൾക്കുള്ളിലാകും മോഹൻലാൽ ജോയിൻ ചെയ്യുന്നത്. ഇതിനിടയിൽ നേരിന്റെ ഷൂട്ടിംഗും ഡബ്ബിംഗും ഉള്ളതിനാലാണ് ഷൂട്ടിംഗിനിടയിൽ ജോയിൻ ചെയ്യുന്നത്. പിന്നീട് ഷെഡ്യൂള് ബ്രേക്ക് ആവുന്ന സിനിമയുടെ രണ്ടാം ഷെഡ്യൂള് അടുത്ത വര്ഷം ഫെബ്രുവരിയിലാണ് ആരംഭിക്കുകയെന്നാണ് റിപ്പോര്ട്ടുകള്. അതേസമയം ലൂസിഫറില് ഉള്ളവരെ കൂടാതെ പുതിയ താരനിരയും ചിത്രത്തില് എത്തുമെന്നും പറയപ്പെടുന്നുണ്ട്. ചിത്രീകരണത്തിനിടെ ഇത് പ്രഖ്യാപിക്കും.
കഴിഞ്ഞ ദിവസം ചിത്രത്തിന്റെ ഷൂട്ടിംഗ് ആരംഭിക്കാന് പോകുന്നതിന്റെ തീയതി അണിയറ പ്രവര്ത്തകര് പുറത്തുവിട്ടിരുന്നു. ഒന്നാം ഭാഗമായ ലൂസിഫറിന്റെ ചില രംഗങ്ങള് കോര്ത്തിണക്കിക്കൊണ്ട് തയ്യാറാക്കിയ വീഡിയോയിലൂടെയാണ് അണിയറ പ്രവര്ത്തകര് ഇക്കാര്യം അറിയിച്ചത്. രണ്ട് മിനിട്ട് 34 സെക്കന്റുള്ള വീഡിയോ ലൂസിഫറില് കഥ പറച്ചില് ക്യാരക്ടറിലൂടെ ശ്രദ്ധനേടിയ ഇന്ദ്രജിത്തിന്റെ കഥാപാത്രത്തിന്റെ ഡയോലോഗിലൂടെയാണ് അവസാനിക്കുന്നത്.
മുമ്പ് ഷൂട്ടിങ്ങിനിടെ ഉണ്ടായ പരിക്ക് മൂലം മൂന്ന് മാസത്തെ ചികിത്സയും വിശ്രമവും കഴിഞ്ഞാണ് സംവിധായകന് പൃഥ്വിരാജ് എമ്പുരാന്റെ ഷൂട്ടിങ്ങിനായി ഇറങ്ങുന്നത്. ജോലിക്ക് പോകുന്നതിന് മുന്പുള്ള താരത്തിന്റെ ഒരു ചിത്രം സുപ്രിയ ഇന്സ്റ്റഗ്രാമിലൂടെ നേരത്തെ പങ്കുവെച്ചിരുന്നു.
മലയാള സിനിമയിലെ ഏറ്റവും കൂടുതല് മുതല് മുടക്കുള്ള ചിത്രങ്ങളില് ഒന്നായിട്ടാണ് എമ്പുരാന് എത്തുന്നത്. മലയാളം, തമിഴ്, തെലുങ്ക്, കന്നട, ഹിന്ദി തുടങ്ങിയ ഭാഷകളില് ഒരുങ്ങുന്ന ഒരു പാന് ഇന്ത്യന് ചിത്രമായിരിക്കും എമ്പുരാന്.
