ആൻഡ്രോയിഡ് 14 ഓപ്പറേറ്റിംഗ് സിസ്റ്റവുമായി വിപണിയിലെത്തുന്ന ആദ്യത്തെ ഫോണുകളെന്ന പദവി സ്വന്തമാക്കി ഗൂഗിൾ പിക്സൽ 8 സീരിസ്. പിക്സൽ 8, പിക്സൽ 8 പ്രോ എന്നീ ഫോണുകളും വാച്ചും ഇയർബഡ്സുമാണ് ഗൂഗിൾ അവതരിപ്പിച്ചത്. എഐ മോഡലിന്റെ പിന്തുണയോടെയാണ് സ്മാർട്ട് ഫോണുകളെത്തുന്നത്.
മെച്ചപ്പെട്ട ഗ്രാഫിക്സ് അനുഭവം ആൻഡ്രോയിഡ് 14 നൽകുമെന്നാണ് ഗൂഗിൾ പറയുന്നത്. കസ്റ്റമൈസ് ചെയ്യാൻ സാധിക്കുന്ന ലോക്ക് സ്ക്രീൻ, മെച്ചപ്പെട്ട ക്യാമറ, ഓഡിയോ ഓവർ യുഎസ്ബി ഉൾപ്പടെ ഒട്ടനവധി പുതുമകളുമായാണ് ആൻഡ്രോയിഡ് 14 എത്തുന്നത്.
6.2 ഇഞ്ച് ഒഎൽഇഡി ഡിസ്പ്ലേയാണ് പിക്സൽ 8-നുള്ളത്. 120 Hz റിഫ്രഷ് റേറ്റും 2000 നിറ്റ്സ് പീക്ക് ബ്രൈറ്റ്നസുമാണ് ഉള്ളത്. രണ്ട് പിൻ ക്യാമറകളാണ് അവതരിപ്പിച്ചിട്ടുള്ളത്. 50 മെഗാപിക്സൽ ഒക്ട-പിഡി പ്രൈമറി ക്യാമറയും മാക്രോ ഫീച്ചറുകളുള്ള 12 മെഗാപിക്സൽ സെൻസറും പിക്സൽ 8-ൽ നൽകിയിട്ടുണ്ട്. 10.5 മെഗാപിക്സലാണ് സെൽഫി ക്യാമറ. 27 W ചാർജിംഗ് പിന്തുണയ്ക്കുന്ന 4575 mAh ബാറ്ററിയാണ് നൽകിയിരിക്കുന്നത്. 18 W വയർലെസ് ചാർജിംഗ് സപ്പോർട്ടും ഗൂഗിൾ പിക്സൽ 8-ൽ ഉണ്ട്.
6.7 ഇഞ്ച് ഒഎൽഇഡി ഡിസ്പ്ലേയാണ് പിക്സൽ 8 പ്രോയ്ക്കുള്ളത്. 2400 നിറ്റ്സ് പീക്ക് ബ്രൈറ്റ്നസും ഗൊറില്ലാ ഗ്ലാസ് പ്രൊട്ടക്ഷനും നൽകുന്നു. 50 മെഗാ പിക്സൽ വൈഡ് ക്യാമറ, 48 മെഗാപിക്സൽക്വാഡ്-പിസി അൾട്രവൈഡ് സെൻസർ, 30 X സൂപ്പർ റെസ് ഡിജിറ്റൽ സൂമുള്ള 48 മെഗാ പിക്സൽ സൂം ക്യാമറ എന്നിങ്ങനെ ട്രിപ്പിൾ ക്യാമറ സെൻസറുമായാണ് പിക്സൽ 8 പ്രോ വിപണിയിലെത്തുന്നത്. 30 W വയേർഡ് ചാർജിംഗ് പിന്തുണയ്ക്കുന്ന 5050 mAh ബാറ്ററിയാണ് ഫോണിലുള്ളത്. 23 W വയർലെസ് ചാർജിംഗ് ഇത് പിന്തുണയ്ക്കുന്നു.
ഇരു ഫോണുകളും ഗൂഗിളിന്റെ പുതിയ ടെൻസർ ജി23 ചിപ്സെറ്റിലാണ് എത്തുന്നത്. 2023 വരെ ആൻഡ്രോയിഡ് അപ്ഡേറ്റ് ഉൾപ്പെടെയുള്ള സവിശേഷതകളാണ് ഫോണുകളിലുള്ളത്. പിക്സൽ 8 പ്രോയുടെ പിൻഭാഗത്ത് താപനില സ്കാൻ ചെയ്യുന്നതിനായി Temperature Sensor ഗൂഗിൾ അവതരിപ്പിച്ചിട്ടുണ്ട്. തെർമോമീറ്റർ ആപ്പ് സംവിധാനം ഉടനെത്തുമെന്നാണ് വിവരം. പിക്സൽ 8-ന് 75,999 രൂപയും പിക്സൽ 8 പ്രോയ്ക്ക് 1,06,999 രൂപയുമാണ് വില. ഫ്ളിപ്പ്കാർട്ടിൽ പ്രീ ഓർഡർ ചെയ്യാവുന്നതാണ്.
നിരവധി ഓഫറുകളും കിഴിവുകളുമാണ് പിക്സൽ 8 സീരിസിന് നൽകിയിരിക്കുന്നത്. ഇന്ത്യയിൽ 64,999 രൂപയ്ക്ക് പിക്സൽ 8 വാങ്ങാവുന്നതാണ്. അതായത്, 11,000 രൂപയുടെ കിഴിവിൽ. 8,000 രൂപയുടെ ബാങ്ക് കിഴിവും 3,000 രൂപയുടെ അധിക എക്സ്ചേഞ്ച് ഡിസ്കൗണ്ടും ലഭിക്കും. സമാനരീതിയിൽ 8 പ്രോയ്ക്ക് ആകെ 13,000 രൂപയുടെ കിഴിവാണ് ലഭിക്കുന്നത്. 9,000 ബാങ്ക് കിഴിവും 4,000 രൂപ എക്സ്ചേഞ്ച് ഓഫറും ലഭിക്കും. ഇതോടെ 8 പ്രോയുടെ വില 93,999 രൂപയായി കുറയും. ആക്സിസ് ബാങ്ക്, ഐസിഐസിഐ ബാങ്ക്, കൊട്ടക് ബാങ്ക് കാർഡുകൾ ഉപയോഗിച്ച് ഈ കിഴിവുകൾ സ്വന്തമാക്കാവുന്നതാണ്.