തെന്നിന്ത്യയുടെ പ്രിയതാരം അല്ലു അർജ്ജുന്റെ മെഴുക് പ്രതിമ ഒരുങ്ങുന്നു. ലണ്ടനിലെ മാഡം തുസാഡ്സ് വാക്സ് മ്യൂസിയത്തിൽ ഈ വർഷം അവസാനത്തോടെ പ്രതിമ അനാച്ഛാദനം ചെയ്യും. പ്രതിമ തയ്യാറാക്കുന്നതിനായി അല്ലു അർജ്ജുന്റെ അളവ് വിവരങ്ങൾ എടുക്കുന്ന വീഡിയോ കഴിഞ്ഞ ദിവസം പുറത്ത് വന്നിരുന്നു.
മാഡം തുസാഡ്സ് വാക്സ് മ്യൂസിയത്തിൽ ഇടം പിടിക്കുന്ന മൂന്നാമത്തെ തെന്നിന്ത്യൻ താരമാണ് അല്ലു അർജ്ജുൻ. ബാഹുബലി ലുക്കിൽ പ്രഭാസും, സ്‌പൈഡർ സിനിമയിലെ ലുക്കിൽ മഹേഷ് ബാബുവുമാണ് വാക്സ് മ്യൂസിയത്തിലെ മറ്റ് താരങ്ങൾ. തന്റെ ഭാഗ്യചിത്രം പുഷ്പ ലുക്കിൽ തന്നെയാകും അല്ലു അർജ്ജുൻ വാക്സ് മ്യൂസിയത്തിൽ പ്രത്യക്ഷപ്പെടുക.
അമിതാഭ് ബച്ചൻ, ഐശ്വര്യ റായ്, ഷാരൂഖ് ഖാൻ, ഹൃത്വിക് റോഷൻ, പ്രിയങ്ക ചോപ്ര, ദീപിക പദുക്കോൺ, സൽമാൻ ഖാൻ, കരീന കപൂർ തുടങ്ങിയ ഇന്ത്യൻ താരങ്ങളുടെ മെഴുക് രൂപങ്ങളുടെ വിപുലമായ ശേഖരവും ലണ്ടനിലെ മാഡം തുസാഡ്സ് വാക്സ് മ്യൂസിയത്തിൽ പ്രദർശിപ്പിച്ചിട്ടുണ്ട്.
ഈ വർഷം 200 താരങ്ങളുടെ മെഴുക് പ്രതിമകളാണ് വാക്സ് മ്യൂസിയത്തിൽ ഒരുങ്ങുന്നത്. ഇതിനായി തിരഞ്ഞെടുക്കപ്പെട്ട പ്രശസ്ത വ്യക്തികളുടെ അളവ് വിവരങ്ങൾ ശേഖരിക്കുന്ന പ്രവൃത്തി മ്യൂസിയം അധികൃതർ തുടങ്ങിക്കഴിഞ്ഞു.
