സർക്കാർ തികഞ്ഞ അവഗണന കാണിക്കുന്ന കെഎസ്ആർടിസി ജീവനക്കാരുടെ ജീവിതത്തെ ആസ്പദമാക്കി സിനിമയൊരുങ്ങുന്നു. കുട്ടനാടിന്റെ മനോഹാരിതയിലൊരുങ്ങുന്ന ചിത്രമാണ് ‘റാഹേൽ മകൻ കോര’. ഉബൈനി സംവിധാനം ചെയ്യുന്ന ചിത്രം ഒക്ടോബർ 13-നാകും തിയേറ്ററിലെത്തുക.
കെഎസ്ആർടിസി ബസിൽ കണ്ടക്ടറായി സ്ഥിരം ജോലിയിൽ എത്തുന്ന ചെറുപ്പക്കാരന്റെയും അയാൾ എത്തുന്നതിലൂടെ ജോലി നഷ്ടമാകുന്ന താത്കാലിക ജീവനക്കാരിയുടെയും ജീവിതത്തിലൂടെയാണ് ചിത്രം സഞ്ചരിക്കുന്നത്. ആൻസൺ പോൾ നായകനാകുന്ന ചിത്രത്തിൽ മെറിൻ ഫിലിപ്പാണ് നായിക. എസ്.കെ ഫിലിംസിന്റെ ബാനറിൽ ഷാജി കെ. ജോർജാണ് നിർമാണം.
ജോബി എടത്വയുടേതാണ് തിരക്കഥ. ഹരി നാരായണനും മനു മഞ്ജിത്തും ചേർന്നാണ് ചിത്രത്തിന്റെ വരികളെഴുതിയിരിക്കുന്നത്. കൈലാസ് മോനോനാണ് സംഗീത സംവിധാനം. വിജയകുമാർ, അൽത്താഫ് സലിം, മനു പിള്ള, മധു പുന്നപ്ര, മുൻഷി രഞ്ജിത്ത്, ബ്രൂസ്ലി രാജേഷ്, കോട്ടയം പുരുഷൂ, അയോധ്യാ ശിവൻ, ഹൈദരാലി, ബേബി എടത്വ, അർണവ് വിഷ്ണു, ജോപ്പൻ മുറിയാനിക്കൽ, രശ്മി അനിൽ, മഞ്ജു എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു.