ഏഷ്യൻ ഗെയിംസിൽ അമ്പെയ്ത്ത് കോമ്പൗണ്ട് വിഭാഗത്തിൽ വലിയ നേട്ടമാണ് ഇന്ത്യൻ താരങ്ങൾ സ്വന്തമാക്കിയിരിക്കുന്നത്. ഇന്ത്യയുടെ അമ്പെയ്ത്ത് ടീം ചരിത്രം സൃഷ്ടിച്ചുവെന്ന് സന്തോഷം പങ്കുവെച്ച് അമ്പെയ്ത്ത് അസോസിയേഷൻ വൈസ് പ്രസിഡന്റ് കൈലാഷ് മുരാർക്ക. ഏഷ്യൻ ഗെയിംസിന്റെ ചരിത്ര വിജയത്തെ കുറിച്ച് മാദ്ധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.
‘ഇത് സന്തോഷകരമായ നിമിഷമാണ്. ഇന്ത്യയുടെ അമ്പെയ്ത്ത് ടീം ചരിത്രം സൃഷ്ടിച്ചു. താരങ്ങളുടെ പ്രകടനങ്ങൾ ഇനിയും മികച്ചതാകുക തന്നെ ചെയ്യും. രാജ്യത്തെ എല്ലാ പൗരന്മാരെയും വില്ലാളികളെയും അവരുടെ കുടുംബങ്ങളെയും, നമ്മുടെ സർക്കാരിന്റെ കായിക വകുപ്പിനെയും താൻ അഭിനന്ദിക്കുന്നു. നമ്മുടെ അമ്പെയ്ത്തുകാർ ഒളിമ്പിക്സിലും ഇതേ രീതിയിൽ മികച്ച പ്രകടനം നടത്തുമെന്ന് ഞങ്ങൾക്ക് പരിപൂർണ വിശ്വാസമുണ്ടെന്നും അദ്ദേഹം പറഞ്ഞു.
ഏഷ്യൻ ഗെയിംസിൽ പുരുഷന്മാരുടെ അമ്പെയ്ത്ത് കോമ്പൗണ്ട് വിഭാഗത്തിൽ ഓജസ് ഡിയോടേലി ഇന്ത്യയ്ക്ക് വേണ്ടി സ്വർണം നേടിയപ്പോൾ അഭിഷേക് വർമ്മ വെള്ളി മെഡൽ കരസ്ഥമാക്കി. വനിതകളുടെ അമ്പെയ്ത്ത് കോമ്പൗണ്ട് വിഭാഗത്തിലും ഇന്ത്യ മിന്നും വിജയം നേടിയെടുത്തു. ജോതി സുരേഖ സ്വർണവും അദിതി ഗോപിചന്ദ് വെങ്കലവും നേടി.
മൂന്ന് സ്വർണം ഉൾപ്പെടെ അഞ്ച് മെഡലുകളാണ് ഇന്ത്യ നേടിയത്. വനിതാ കബഡി ടീം സ്വർണ മെഡൽ നേടിയതോടെ 100 മെഡൽ എന്ന സുവർണ നേട്ടം സ്വന്തമാക്കിയിരിക്കുകയാണ് രാജ്യം. ഇതോടെ 25 സ്വർണ മെഡൽ തിളക്കവും ഇന്ത്യയ്ക്ക് സ്വന്തമായി.
