മൂന്ന് അല്ലെങ്കിൽ നാല് വർഷത്തിനുള്ളിൽ സ്പേസ് എക്സ് ചൊവ്വയിൽ ഇറങ്ങുമെന്ന് പ്രഖ്യാപിച്ച് ഇലോൺ മസ്ക്. അസർബൈജാനിലെ ബാക്കുവിൽ നടന്ന ഇന്റർനാഷണൽ ആസ്ട്രോനോട്ടിക്കൽ കോൺഗ്രസിൽ നടന്ന വീഡിയോ കോൺഫറൻസിലാണ് ഇക്കാര്യം പ്രഖ്യാപിച്ചത്. സ്പേസ് എക്സ് സ്ഥാപകനും സിഇഒയുമായ ഇലോൺ മസ്ക് ചൊവ്വയിൽ ബഹിരാകാശ പേടകം ഇറക്കുമെന്ന് പ്രഖ്യാപിക്കുകയായിരുന്നു.
ഇതുവരെ നിർമ്മിച്ചിട്ടുള്ളതിൽ വെച്ച് ഏറ്റവും വലുതും ശക്തമായതുമായ വിക്ഷേപണ വാഹനമാണ് സ്പേസ് എക്സ് സ്റ്റാർഷിപ്പ്. വരാനിരിക്കുന്ന ദൗത്യങ്ങളിൽ കൂടുതൽ കാര്യങ്ങൾ പദ്ധതിയിടുന്നുവെന്നും അദ്ദേഹം സൂചിപ്പിച്ചു. മൂന്നോ നാലോ വർഷങ്ങൾക്കുള്ളിൽ സ്പേസ് എക്സ് ചൊവ്വയിൽ ഒരു ബഹിരാകാശ പേടകം ഇറക്കുന്നതിനുള്ള സാദ്ധ്യതകൾ വിലയിരുത്തുകയാണ്.
സ്പേസ് എക്സിന്റെ സ്റ്റാർഷിപ്പ് ഏപ്രിൽ 20-നാണ് ബോക ചിക്കയിലെ സ്റ്റാര്ഡബേസ് ഫെസിലിറ്റിയിൽ നിന്നും ആദ്യ പരീക്ഷണ പറക്കൽ നടത്തിയത്. 90 മിനിറ്റ് എന്ന നിലയിലാണ് പദ്ധതി രൂപകൽപ്പന ചെയ്തിരുന്നതെങ്കിലും നാല് മിനിറ്റിനുള്ളിൽ പരാജയപ്പെടുകയായിരുന്നു. തിരിച്ചടികളിൽ നിന്നും കൂടുതൽ കാര്യങ്ങൾ പഠിക്കുന്നുവെന്ന് അദ്ദേഹം വ്യക്തമാക്കി.